ចាប់បញ្ជូនស្រ្តីម្នាក់ឡើងតុលាការរឿងចេញសែកស្អុយ៣០មុឺនដុល្លារ

ស្ត្រីវ័យក្មេងម្នាក់ ត្រូវបាននគរបាលនាយកដ្ឋានព្រហ្មទណ្ឌក្រសួងមហាផ្ទៃចាប់ខ្លួនបញ្ជូនមកកាន់អយ្យការអមសាលាដំបូង ពាក់ព័ន្ធបទល្មើសចេញសែកអត់លុយ៣០មុឺនដុល្លារសងទៅម្ចាស់បំណុល ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យឈ្មោះ សិទ្ធិគុណ សក្តិនិតា អាយុ២៧ឆ្នាំ មុខរបរលក់ដូរ ស្នាក់នៅបុរីពិភពថ្មីចំការដូង១ ផ្ទះលេខ៧៩E០ និង E១ ផ្លូវលេខ៧ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ ការចាប់ខ្លួនស្ត្រីអាជីវករខាងលើនេះត្រូវបាន សមត្ថកិច្ចបង្ហើបឲ្យដឹងថា ជាការអុវត្តតាមដីកាបញ្ជាឲ្យចូលខ្លួនរបស់លោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ និងយោងទៅលើពាក្យបណ្តឹងរបស់ជនរងគ្រោះជាម្ចាស់បំណុល ។

ឈ្មោះ សិទ្ធិគុណ សក្តិនិតា ដែលជាមនុស្សរាប់អានជាមួយដើមបណ្តឹងហើយបានទៅពឹងពាក់រកខ្ចីលុយចំនួន៣០ម៉ឺនដុល្លារ អាមេរិកដើម្បីយកទៅពង្រីកមុខរបររកស៊ី ហើយឈ្មោះ សិទ្ធិគុណ សក្តិនិតា និយាយបញ្ជាក់ប្រាប់ដើមបណ្តឹង​ថា ឆក់លុយបងឯងតែរយៈពេល២០ថ្ងៃប៉ុណ្ណោះ គេនឹងបង្វិលសងវិញហើយ ។

លុះដល់ថ្ងៃទី២១ ខែកញ្ញា ឆ្នាំ២០២២ ឈ្មោះ សិទ្ធិគុណ សក្តិនិតា បានចេញមូលប្បទានបត្រ ( សែក )១សន្លឹករបស់ ធនាគារដែលមានទឹកប្រាក់ចំនួន៣០ម៉ឺនដុល្លារ អាមេរិកឲ្យទៅដើមបណ្តឹងដើម្បីទូទាត់ប្រាក់លើបំណុលនោះវិញ ។ ប៉ុន្តែដល់ថ្ងៃកំណត់នៅពេលដើមបណ្តឹងបានយកមូលប្បទានបត្រ នោះទៅបើកប្រាក់នៅ ធនាគារស្រាប់តែខាងធនាគារឆ្លើយតបថា មូលប្បទានបត្រនេះគ្មានសាច់ប្រាក់ទេពេលនោះ ដើមបណ្តឹងក៏បានទំនាក់ទំនងទៅឈ្មោះ សិទ្ធិគុណ សក្តិនិតា ប៉ុន្តែទាក់ទងមិនបានរហូត ទើបដើមបណ្តឹងសម្រេចចិត្តដាក់ពាក្យប្តឹងទៅសមត្តកិច្ចដើម្បីឲ្យជួយចាត់ការតាមផ្លូវច្បាប់ ។

ករណីដូចបានបញ្ជាក់តាមអង្គហេតុខាងលើនេះហើយទើបបានសមត្ថកិច្ចនាយកដ្ឋាននគរបាលព្រហ្មក្រសួងចាប់ខ្លួនស្ត្រីអាជីវកររូបនោះបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី ៕

អត្ថបទ៖ មករា