តើបណ្ណាល័យសម្តេចម៉ែ មានផ្ទុកឯកសារអ្វីខ្លះ?

បណ្ណាល័យសម្តេចម៉ែ ត្រូវបានបង្កើតឡើងដោយមជ្ឈមណ្ឌលឯកសារកម្ពុជា ក្នុងគោលបំណងថ្វាយព្រះកិត្តិយសជាទីគោរពដ៏ខ្ពង់ខ្ពស់បំផុតជូនសម្តេចព្រះមហាក្សត្រី នរោត្តម មុនិនាថ សីហនុ ដែលទ្រង់បានខិតខំប្រឹងប្រែង ដើម្បីប្រទេសជាតិ និងប្រជាជនខ្មែរ។ បណ្ណាល័យនេះ មានផ្ទុកឯកសារជាច្រើន ហើយត្រូវសម្ពោធដាក់ឱ្យដំណើរការកាលពីឆ្នាំ២០២០។

បណ្ណាល័យម្តេចម៉ែ មានឯកសារដូចជា ប្រវត្តិសាស្ត្រប្រទេសកម្ពុជា និងឯកសារស្តីពីរបបកម្ពុជាប្រជាធិបតេយ្យ ឆ្នាំ​១៩៧៥ ដល់ឆ្នាំ១៩៧៩ ប្រមាណ ១លាន៧សែនទំព័រ ដែលត្រូវបានស្រាវជ្រាវដោយបុគ្គលិកនៅមជ្ឍមណ្ឌលឯកសារកម្ពុជា ដោយប្រើពេលអស់ប្រមាណជាង២០ឆ្នាំមកហើយ។

ស្របជាមួយគ្នានេះ នៅចុងឆ្នាំ២០១៩ លោកឯកអគ្គរាជទូតបណ្ឌិត ហូលីយ៉ូ អេ. ជែលដ្រេស បានបរិច្ចាគសមុច្ច័យជាសៀវភៅប្រមាណជាង ៣ ០០០ក្បាល និងឯកសារចំនួន ២៨០០ប្រអប់ ដែលប្រមូលដោយលោកឯកអគ្គរាជទូតបណ្ឌិត ហូលីយ៉ូ អេ. ជែលដ្រេស ក្នុងកំឡុងពេលដែលលោកចងក្រង និងកត់ត្រាឯកសារ ស្តីរាជវង្សានុវង្ស និងប្រវត្តិសាស្ត្ររបស់ប្រទេសកម្ពុជា។ មិនត្រឹមតែមានឯកសារ និងសៀវភៅបែបប្រវត្តិសាស្ត្រនោះទេ នៅបណ្ណាល័យសម្តេចម៉ែ ក៏មានតម្កល់ជាឯកសារជាច្រើនដូចជា ឯកសារបែបរូបភាព ភាពយន្ត និងខ្សែអាត់សម្លេងរបស់ជនរងគ្រោះនៅក្នុងរបបខ្មែរក្រហម។ ទន្ទឹមគ្នានោះ ដើម្បីអភិរក្ស និងថែរក្សាឯកសារទាំងនេះឱ្យបានគង់វង្ស និងបន្សល់ទុកសម្រាប់ប្រជាជនខ្មែរ ឯកសារទាំងនេះក៏ត្រូវបានបង្កើតជាទម្រាំងឌីជីថលឱ្យមានគុណភាពខ្ពស់ផងដែរ។

អ្វីដែលកាន់តែពិសេសនោះ គឺបណ្ណាល័យសម្តេចម៉ែ បង្កើតឡើងជាការឧទ្ទិសដល់ស្ត្រីកម្ពុជាទាំងអស់ទាំងស្ថិតនៅក្នុងអតីតកាល បច្ចុប្បន្ន និងអនាគត។ ព្រមទាំងបង្ហាញពីឥទ្ធិពលរបស់ស្ត្រីក្នុងការចូលរួមចំណែកជួយស្តារជាតិជាថ្មីក្រោយពីដួលរលំរបបខ្មែរក្រហម តាមរយៈមើលថែក្រុមគ្រួសារ ពង្រីកសេដ្ឋកិច្ច អភិរក្សការពារវប្បធម៌ខ្មែរឡើងវិញបន្ទាប់ពីរួចផុតពីរបបដ៏ខ្មៅងងឹតមួយនោះ។

បណ្ណាល័យសម្តេចម៉ែ មានទីតាំងស្ថិតនៅផ្ទះលេខ៦៦ មហាវិថីព្រះសីហនុ ដែលដាក់ដំណើរការឱ្យសាធារណជនចូលទស្សនាតាំងពីឆ្នាំ២០២០ ជាកន្លែងផ្តល់នូវការអប់រំបន្ថែមទៀតសម្រាប់ប្រជាជនកម្ពុជា។ ក្នុងកំឡុងពេលវិបត្តិកូវីដ-១៩ មជ្ឈមណ្ឌលឯកសារកម្ពុជា ក៏បានរក្សាសិទ្ធិអនុញ្ញាតឱ្យសាធារណជនអាចប្រើប្រាស់បណ្ណាល័យសម្តេចម៉ែបានតាមរយៈប្រព័ន្ធអនឡាញផងដែរ។

តាមការកត់សម្គាល់ បណ្ណាល័យសម្តេចម៉ែ មានទាំងភ្ញៀវជាតិ និងអន្តរជាតិ បានធ្វើទស្សនកិច្ចជាហូរហែរ ក្នុងនោះ ក៏សម្បូរទៅដោយឥស្សជនជាន់ខ្ពស់ជាច្រើនផងដែរ។ ដោយឡែក នៅក្នុងឆ្នាំ២០២២ កំឡុងពេលកិច្ចប្រជុំកំពូលអាស៊ានដែលកម្ពុជាជាម្ចាស់ផ្ទះ មានស្ត្រីជាភរិយារបស់ថ្នាក់ដឹកនាំកំពូលប្រទេសជារូបដែលបានទស្សនានៅបណ្ណាល័យនេះមានដូចជា ភរិយារបស់ប្រធានាធិបតីឥណ្ឌណេស៊ី ភរិយារបស់នាយករដ្ឋមន្ត្រីឡាវ ភរិយារបស់ប្រធានាធិបតីហ្វីលីពីន ភរិយារបស់នាយករដ្ឋមន្ត្រីថៃ ភរិយាប្រធានស្ថាប័នវេទិកាសេដ្ឋកិច្ចពិភពលោក និងភរិយារបស់លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា។

សូមជម្រាបថា មជ្ឈមណ្ឌលឯកសារកម្ពុជា ត្រូវបានបង្កើតឡើងនៅឆ្នាំ១៩៩៥ ហើយបានក្លាយជាស្ថាប័នស្រាវជា្រវឯករាជ្យនៅឆ្នាំ១៩៩៧។ មជ្ឈមណ្ឌលឯកសារកម្ពុជា គឺជាកន្លែងតម្កល់ និងស្រាវជ្រាវនូវឯកសារនានាក្នុងរបបខ្មែរក្រហមសម្រាប់មនុស្សជំនាន់ក្រោយ។ មជ្ឈមណ្ឌលឯកសារកម្ពុជា ត្រូវបានគ្រប់គ្រងដោយលោក ឆាំង យុ ជាបុគ្គលម្នាក់ដែលបានរស់រានមានជីវិតពីរបបប្រល័យពូជសាសន៍ថែមទៀតផង៕

ដោយ៖ អុន ស្រីមាន