សន្តិសុខសង្គម

គោ០៨ក្បាលត្រូវបានរន្ទះបាញ់ងាប់កាលពីយប់ម្សិលមិញ នៅក្នុងស្រុកបរិបូណ៌

បានផុស

៣ years មុន

នៅ

ថ្ងៃសៅរ៍ ៨ មេសា ២០២៣

ដោយ

កំពង់ឆ្នាំង ៖ សត្វគោ០៨ក្បាលរបស់ប្រជាពលរដ្ឋត្រូវបានរន្ទះបាញ់ងាប់នៅពាក់កណ្ដាលអធ្រាត្រ ស្ថិតនៅក្នុងភូមិកំពង់អួរ ឃុំឃុនរ៉ង់ ស្រុកបរិបូណ៌។

លោកមេភូមិកំពង់អួរបានប្រាប់តាមទូរសព្ទឱ្យដឹងថា នៅវេលាម៉ោង០១ និង០០នាទី រំលងអធ្រាត្រឈានចូលថ្ងៃទី០៨ ខែមេសា ឆ្នាំ២០២៣ មានភ្លៀងមួយមេយ៉ាងខ្លាំង លាយឡំនិងផ្គររន្ទះផង បានធ្វើឲ្យសត្វគោចំនួន ០៨ ក្បាលដេកក្នុងក្រោលត្រូវរន្ទះបាញ់ងាប់នៅនិងកន្លែង។

លោកមេភូមិបានបញ្ជាក់ថា ហ្វូងគោដែលនៅក្នុងក្រោលទាំងអស់មានជាង២០ក្បាល តែត្រូវរន្ទះបាញ់ងាប់ចំនួន០៨ក្បាល ក្រៅពីនោះពុំមានគ្រោះថ្នាក់អ្វីឡើយ។

លោកបញ្ជាក់ទៀតថា សត្វគោទាំងអស់នេះមានម្ចាស់នៅភូមិសេរី ឃុំខុនរ៉ង ដោយម្ចាស់បានធ្វើក្រោលឱ្យគោដេកនៅមុខវត្តកំពង់អួររាល់យប់ថ្ងៃដែលមានចម្ងាយពីផ្ទះម្ចាស់ប្រមាណជា២គីឡូម៉ែត្រ ដើម្បីជាការងាយស្រួលឃ្វាលផងដែរ។

ក្នុងហេតុការណ៍ខាងលើនេះ ម្ចាស់គោមានការសោកស្ដាយយ៉ាងខ្លាំង តែនេះវាជាគ្រោះធម្មជាតិដែលមិនអាចដឹងមុន ហើយការបាត់បង់សត្វគោ៨ក្បាលនេះ គឺជាខាតបង់មួយមានទំហំធំផងដែរសម្រាប់ប្រជាកសិករនៅស្រុកស្រែ។ ក្នុងនាមលោកជាអាជ្ញាធរមានតែការចូលរួមសោកស្ដាយជាមួយនឹងម្ចាស់គោតែប៉ុណ្ណោះ។

លោកសូមអំពាវនាវដល់បងប្អូនប្រជាពលរដ្ឋយើងនៅក្នុងភូមិស្រុកតាមទីជនបទទាំងអស់ ត្រូវមានការប្រុងប្រយ័ត្នខ្ពស់ទាំងអស់គ្នាព្រោះរដូវវស្សាជិតចូលមកដល់ហើយ គ្រោះធម្មជាតិ ទាំងភ្លៀង ផ្គរ រន្ទះ ខ្យល់កន្ត្រាក់ពិតជាកើតមានដែលយើងត្រូវតែមានការប្រុងប្រយ័ត្នគ្រប់គ្នា៕

ដោយ ៖ ឈៀង ថារិទ្ធ