អយ្យការសាលាដំបូងខេត្តកោះកុង បញ្ជាឱ្យជនបង្កគ្រោះថ្នាក់ចរាចរណ៍បុកមនុស្ស ចូលខ្លួនបំភ្លឺ

អយ្យការអមសាលាដំបូងខេត្តកោះកុង បានចេញដីកាបញ្ជាឱ្យជនបង្កចូលបង្ហាញខ្លួននៅស្នងការនគរបាលខេត្ត ដើម្បីសាកសួរ និងបំភ្លឺលើករណីបង្កគ្រោះថ្នាក់ចរាចរណ៍បើកបរបុករះម៉ូតូ ហើយជ្រុលទៅបុកហាងបាយមួយកន្លែងក្បែររង្វង់មូលយាយរែកផ្លែឈើ ក្នុងក្រុងខេរមភូមិន្ទ។

លោក អេង ចាន់ភារ៉ា ព្រះរាជអាជ្ញារងខេត្តកោះកុង តាមរយៈលិខិតដីកាបញ្ជារបស់ខ្លួន នៅថ្ងៃទី១៦ ខែមេសា ឆ្នាំ២០២៣ បានបញ្ជាឱ្យឈ្មោះ សោម វិចិត្រ ហៅប៉ាវ ភេទប្រុស អាយុ ៤៧ឆ្នាំ ជនជាតិខ្មែរ រស់នៅភូមិ៣ សង្កាត់ដងទង់ ត្រូវចូលបង្ហាញខ្លួននៅការិយាលចរាចរណ៍ផ្លូវគោកនៃស្នងការនគរបាលខេត្តកោះកុងឱ្យបានមុនថ្ងៃទី២៣ ខែមេសា ក្នុងគោលបំណងដើម្បីសាកសួរ បំភ្លឺ អំពីករណីបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្តាលឱ្យមានរបួសដល់អ្នកដ៏ទៃ ប្រព្រឹត្តនៅថ្ងៃទី១៤ ខែមេសា ឆ្នាំ២០២៣ ស្ថិតនៅភូមិ៣ សង្កាត់ស្មាច់មានជ័យ។

ព្រះរាជអាជ្ញារងខេត្ត អនុញ្ញាតឱ្យមន្រ្តីនគរបាលយុត្តិធម៌ ប្រើប្រាស់កម្លាំងសាធារណៈ ដើម្បីបង្ខំបុគ្គលខាងលើនេះឱ្យចូលមកបង្ហាញខ្លួន។ ការតម្រូវឱ្យជនបង្កចូលខ្លួនបំភ្លឺនេះ អយ្យការអមសាលាដំបូងខេត្តកោះកុង យោងលើមាត្រា៣៧ មាត្រា៩៤ និងមាត្រា១១៤ នៃក្រមនីតិវិធីព្រហ្មទណ្ឌ។

ដីកាបញ្ជាឱ្យជនបង្កចូលបង្ហាញខ្លួននេះ ធ្វើឡើងទោះបីជា មានតំណាងសាច់ញាតិជនបង្កយល់ព្រមចូលខ្លួនដោះស្រាយតាមច្បាប់រាល់ការខូចខាតទាំងអស់ក៏ដោយ ក៏តុលាការបន្តអនុវត្តនីតិវិធីផងដែរ។

យ៉ាងហោចណាស់ មានមនុស្ស ៧នាក់រងរបួសធ្ងន់ស្រាល ករណីរថយន្ត១គ្រឿងបោះពួយបុកចូលហាងបាយ១កន្លែងក្នុងក្រុងខេមរភូមិន្ទ កាលពីវេលាម៉ោង៧ និង៤៤នាទី យប់ថ្ងៃទី១៤ ខែមេសា ថ្មីៗនេះ បង្កឡើងដោយម្ចាស់រថយន្តបង្កឈ្មោះ សោម វិចិត្រ ហៅប៉ាវ មុខរបរលក់ដូរក្នុងផ្សារដងទង់ បើកបររថយន្តម៉ាក តាកូម៉ា ពណ៌ខ្មៅ ស្លាកលេខភ្នំពេញ 2BQ:4355 បានរត់គេចខ្លួនភ្លាមៗបន្សល់ទុកតែអ្នករួមដំណើរម្នាក់ ហើយធ្វើឱ្យមានភាពភ្ញាក់ផ្អើលជាខ្លាំង។

បើតាមលោក ចាន់ វិចិត្រ អធិការនគរបាលក្រុងខេមរភូមិន្ទ ឱ្យដឹងថា ពុំមានមនុស្សណាស្លាប់នោះនៅនឹងកន្លែងភ្លាមៗទេក្នុងហេតុការណ៍នោះ។ ប៉ុន្តែប្រសិនបើរថយន្តឆាបឆេះកាន់តែខ្លាំងអំឡុងពេលបុកចូលហាងបាយឈ្មោះភក្តី វានឹងបង្កគ្រោះមហន្តរាយធំ ទោះយ៉ាងណាលោកឧត្តមសេនីយ៍ គង់ មនោ ស្នងការនគរបាលខេត្ត និងសមត្ថកិច្ចពាក់ព័ន្ឋទប់ស្កាត់បានទាន់ពេលវេលា។

សមត្ថកិច្ច សន្និដ្ឋានថា ជនបង្កភិតភ័យខ្លាំងបើកបុករះម៉ូតូចំនួន ៥គ្រឿងដែលចតនៅលើចិញ្ចើមថ្នល់ នឹងជ្រុលបុកម៉ូតូកំពុងធ្វើដំណើរស្របទិសដៅជាមួយគ្នាមួយគ្រឿងទៀត ហើយបានជាន់បន្ថែមក្បឿងថាជាហ្រ្វាំង។ វាពុំមែនជាការស្រវឹងស្រានោះទេ នេះបើតាមសាកសួរអ្នករួមដំណើរជាមួយជនបង្កដែលនាំខ្លួនមកកាន់អធិការដ្ឋាន៕

អត្តបទ៖ សិរីវឌ្ឍនៈ

ចុចអាន៖ រថយន្តស៊េរីទំនើបបុករបាំងការដ្ឋានសាងសង់ស្ពានអាកាសផ្លូវ៦០ម៉ែត្រ