សន្តិសុខសង្គម

អ្នកញៀនល្បែងជល់មាន់ ១៩ នាក់ត្រៀមបញ្ជូនទៅតុលាការ ដោយគ្មានការអនុគ្រោះ

បានផុស

៣ ខែ មុន

នៅ

ថ្ងៃអាទិត្យ ៤ មិថុនា ២០២៣

ដោយ

អ្នកញៀនល្បែងភ្នាល់ជល់មាន់ចំនួន ១៩ នាក់ នៅក្រុងបាត់ដំបង ត្រូវឃាត់ខ្លួនអនុវត្តតាមច្បាប់ដោយគ្មានការអនុគ្រោះដើម្បីអប់រំ ដោយកម្លាំងស្នងការខេត្តបានចុះឆ្មក់បង្ក្រាប កាលពីរសៀលថ្ងៃទី៣ ខែមិថុនា ឆ្នាំ២០២៣ វេលាម៉ោង១២ និង ៤៥នាទី នៅចំណុចភូមិវត្តគរ សង្កាត់វត្តគរ ក្រុងបាត់ដំបង បង្កការភ្ញាក់ផ្អើល ខណៈសមត្ថកិច្ចដែនមូលដ្ឋានសំងំស្ងៀមមិនដឹងមិនឮ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចស្នងការខេត្តបានឱ្យដឹងថា កិច្ចប្រតិបត្តិការខាងលើនេះធ្វើឡើងតាមរយៈបញ្ជាផ្ទាល់របស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងក៏ដូចជាលោកឧត្តមសេនីយ៍ត្រី លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ ដោយក្នុងនោះមានការសម្របសម្រួលទៅលេីនីតិវិធីពី លោក កែវ សុជាតិ ព្រះរាជអាជ្ញា នៃអយ្យការអមសាលា ដំបូងខេត្តផង។

លោកវរសេនីយ៍ឯក ឈឿង គឹមសុង ស្នងការរងបានដឹកនាំកម្លាំងក្រុមអន្តរាគមន៍ បង្ការ បង្ក្រាប បានចុះប្រតិបត្តិការបង្ក្រាបតែម្តង ក្នុងនោះបានធ្វេីការនាំខ្លួនមនុស្សចំនួន ១៩ នាក់ មកមកកាន់ស្នងការដ្ឋាន ដើម្បីសាកសួរ និងកសាងសំណុំរឿងបន្តតាមនីតិវិធី ដោយគ្មានការយោគយល់។

ក្នុងនោះកម្លាំងបានដកហូតវត្ថុតាងមួយចំនួនធំរួមមាន៖ ម៉ូតូចំនួន ១៦ គ្រឿង, ជញ្ជីង សម្រាប់ថ្លឹងមាន់ជល់ ១, កៅស៊ូ សង្វៀនជល់មាន់ចំនួន ៦ ដុំ, កំសៀវដាំទឹកសម្រាប់ស្អំមាន់ជល់ ១, នាឡិកាកំណត់នាទី ចំនួន ១ គ្រឿង។ បច្ចុប្បន្ន ការិយាល័យជំនាញកំពុងធ្វេីការកសាងសំណុំរឿងដេីម្បីបញ្ជូនទៅសាលាដំបូងខេត្តបាត់ដំបង ចាត់ការបន្តតាមនីតិវិធី៕

អត្ថបទ៖ សៅ សារិទ្ធ