ការិយាល័យនគរបាលចរាចរណ៍ផ្លូវគោកបញ្ជូនបុរសម្នាក់ដែលល្មើសច្បាប់ចរាចរណ៍ និងបុកសមត្ថកិច្ចទៅតុលាការ

នៅព្រឹកថ្ងៃទី២៣ ខែមិថុនា ឆ្នាំ២០២៣ នគរបាលនៃការិយាល័យនគរបាលចរាចរណ៍ផ្លូវគោក បានបញ្ជូនបុរសម្នាក់ដែលជាម្ចាស់រថយន្តបើកល្មើសភ្លើងសញ្ញាចរាចរណ៍ និងបុកសមត្ថកិច្ចដែលកំពុងអនុវត្តច្បាប់ទៅសាលាដំបូងរាជធានីភ្នំពេញហើយ ដើម្បីអនុវត្តនិតិវិធីច្បាប់។

គួរំលឹកថា កាលពីថ្ងៃទី២២ ខែមិថុនា ឆ្នាំ២០២៣ ម្សិលមិញនេះមានការបង្ហោះវីដេអូចែកចាយតាមបណ្ដាញសង្គមដែលលើកឡើងថា សមត្ថកិច្ចវាយបំបែកកញ្ចក់រថយន្តអ្នកធ្វើដណើរដែលជាការផ្សព្វផ្សាយព័ត៌មានមិនពិត ក្នុងគោលបំណងអាក្រក់ទម្លាក់កំហុសមកលើមន្ត្រីអនុវត្តច្បាប់។

បើតាមស្នងការដ្ឋាននគរបាលរាជធានីភ្នំពេញបានបញ្ជាក់ថា តាមការពិតជាក់ស្ដែងនៅវេលាម៉ោង២និង៤០នាទីរសៀលថ្ងៃទី២២ ខែមិថុនា ឆ្នាំ២០២៣ មានរថយន្តមួយគ្រឿងម៉ាក Toyota Prius ពណ៌ប្រផេះ ពាក់ស្លាកលេខ 2BT-0591 បានបើកបរល្មើសភ្លើងសញ្ញាចរាចរណ៍ (ល្មើសភ្លើងស្តុបក្រហម) នៅចំណុចស្តុបស្ពានអាកាសផ្សារដីហុយ ពេលនោះសមត្ថកិច្ចបានចេញមកឃាត់ តែអ្នកបើកបរមិនត្រឹមតែមិនឈប់ទេ ថែមទាំងបន្ថែមល្បឿនបើកបុកសមត្ថកិច្ចថែមទៀតផង។ ដោយឃើញស្ថានភាពបែបនេះសមត្ថកិច្ចបានផ្តេកខ្លួនទៅរថយន្ត ហើយម្ចាស់រថយន្ដនៅតែបើកទៅមុខរហូតដល់ចម្ងាយជាង ១គីឡូ ។ ដោយមាការចេញជួយឃាត់ពីប្រជាពលរដ្ឋនៅម្ដុំនោះទើបរថយន្តបង្កព្រមឈប់ ជាសំណាងល្អដែលមិនបណ្ដាលឲ្យមានគ្រោះថ្នាក់ដល់សមត្ថកិច្ច ត្រឹមតែរងរបួសតែប៉ុណ្ណោះ ។

របាយការណ៍បន្ថែមថា បន្ទាប់បីបង្កហេតុសមត្ថកិច្ចជំនាញបានឃាត់ខ្លួនម្ចាស់រថយន្តយកមកការិយាល័យចរាចរណ៍ផ្លូវគោក ដើម្បីធ្វើការសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញដើម្បីអនុវត្តបន្តតាមនីតិវិធីច្បាប់៕

អត្ថបទ៖ សុខុម