អាជ្ញាធរណែនាំឱ្យម្ចាស់រមណីយដ្ឋានរៀបចំទីតាំងសុវត្ថិភាពសម្រាប់អ្នកទេសចរបោះតង់

រដ្ឋបាលស្រុកឈូកនៅថ្ងៃទី១០ ខែសីហា ឆ្នាំ២០២៣ បានប្រកាសឱ្យម្ចាស់អាជីវកម្ម ទូកចម្លង ទីតាំងរមណីយដ្ឋាន ផ្ដល់អាវពោងសុវត្ថិភាព នៅពេលជិះទូកចម្លងពីកន្លែងមួយទៅកន្លែងមួយ និងរៀបចំទីតាំងសុវត្ថិភាពឱ្យអ្នកបោះតង់ ហើយរាយការណ៍ប្រាប់អាជ្ញាធរសមត្ថកិច្ច។

ចំណាត់ការនេះ ដើម្បីបង្ការទប់ស្កាត់ហានិភ័យកើតមានឡើងជាយថាហេតុ បណ្ដាលមកពីអាកាសធាតុ ដូចជាខ្យល់កន្ត្រាក់ ជំនន់ទឹកភ្លៀង ជំនន់ទឹកព្រែក។

កន្លងមករដ្ឋបាលស្រុកឈូកសង្កេតឃើញថា មានភ្ញៀវទេសចរជាតិ និងអន្តរជាតិបានមកទស្សនាលេងកម្សាន្តបោះតង់ស្នាក់នៅតំបន់រមណីយដ្ឋានក្នុងស្រុកទឹកឈូ រួមមានតំបន់ទេសចរណ៍ទឹកឈូ ជ្រោះឪម៉ាល់ ទឹកជ្រោះតាដា ដូងទេរ ទំនប់ប្រទ័ក្សក្រឡាជាដើម។

ពាក់ព័ន្ធនឹងបញ្ហានេះ ក្រសួងបរិស្ថានក៏បានណែនាំដល់អង្គភាពជំនាញ រដ្ឋបាលថ្នាក់ក្រោមជាតិ​ និងមន្ទីរបរិស្ថានឱ្យធ្វើការអប់រំ ផ្សព្វផ្សាយ ណែនាំដល់ភ្ញៀវទេសចរដែលមកកម្សាន្តនៅគោលដៅទេសចរណ៍ធម្មជាតិ ក្នុងតំបន់ការពារធម្មជាតិ ជាពិសេសនៅតាមសហគមន៍ទេសចរណ៍ធម្មជាតិទាំងអស់ ឱ្យនៅឆ្ងាយពីតំបន់ទឹកធ្លាក់ ឬផ្លូវទឹក នៅពេលមានភ្លៀងធ្លាក់។

ក្រសួងបរិស្ថាន បញ្ជាក់ថា សហគមន៍តំបន់ការពារ ត្រូវមានអ្នកប្រចាំការនៅតាមតំបន់នីមួយៗ និងជូនដំណឹងដល់ភ្ញៀវទេសចរអំពីហានិភ័យនានា ដែលអាចកើតឡើងជាយថាហេតុ និងការត្រៀមបង្ការនានាដើម្បីសុវត្ថិភាពភ្ញៀវទេសចរ។ ត្រូវដាក់ស្លាកសញ្ញាសម្គាល់ នៅតំបន់ដែលអាចមានគ្រោះថ្នាក់ពេលភ្លៀងធ្លាក់ខ្លាំង ទឹកជំនន់ និងតំបន់ហានិភ័យនានា។

បើតាមក្រសួងបរិស្ថាន អាជ្ញាធរត្រូវត្រៀមសម្ភារ និងឧបករណ៍ចាំបាច់ សម្រាប់ជួយសង្គ្រោះភ្លាមៗក្នុងករណីមានឧប្បត្តិហេតុ ណាមួយកើតឡើង៕