អ្នកទោសដែលត្រូវគេរំដោះ ជាមេជួញដូរគ្រឿងញៀន ជាប់ទោស ៥២ ឆ្នាំ

សមត្ថកិច្ចបានឲ្យដឹងថា ក្រុមខ្មាន់កាំភ្លើងមួយក្រុម បានធ្វើសកម្មភាពភ្ជង់រំដោះអ្នកទោសគ្រឿងញៀនម្នាក់ ក្នុងពេលដែលអ្នកទោសរូបនោះត្រូវបញ្ជូនទៅព្យាបាលធ្មេញនៅគ្លីនិកឯកជន នៅម៉ោង៩ព្រឹក​ថ្ងៃទី១៧ខែសីហាឆ្នាំ២០២៣។

​ជន​សង្ស័យ១ក្រុមបើកបររថយន្ត Lexus ៣៣០ មករំដោះអ្នកទោសជនជាតិចិនម្នាក់ ឈ្មោះ Chen Hsin Han នៅក្បែរបបរសរាជនី កន្លែងពេទ្យធ្មេញ ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប រួចបានយករថយន្តនោះទៅផ្លុង​ចោលនៅជិតបុរីអាខេត ក្នុងសង្កាត់ស្វាយដង្គំ ហើយគេចខ្លួនបាត់។

សមត្ថកិច្ចបន្តថា អ្នកទោសជនជាតិចិនដែល បក្សពួកមករំដោះទៅនោះ ជាមេក្លោងជួញដូរគ្រឿងញៀន ត្រូវតុលាការកាត់ទោសឲ្យជាប់ពន្ធនាគាររយៈពេល៥២ឆ្នាំ កាលពីឆ្នាំ២០០៩។

ប្រភពបន្តថា ក្នុងពេលអនុវត្តទោសនៅក្នុងពន្ធនាគារ អ្នកទោសរូបនេះមានជំងឺឈឺធ្មេញ ពិបាកទទួលទានអាហារ ត្រូវបានមន្ត្រីពន្ធនាគារបញ្ជូនមកព្យាបាល ប៉ុន្តែមិនធូរស្បើយ។

លុះដល់ថ្ងៃកើតហេតុ ជាថ្ងៃដែលគ្រូពេទ្យបានណាត់ជួបអ្នកជំងឺ ក្រុមមន្ត្រីពន្ធនាគារខេត្តសៀមរាប ក៏បានបញ្ជូនអ្នកទោសរូបនោះ។ ក្នុងពេលពេទ្យកំពុងព្យាបាលនោះ ក៏ស្រាប់តែលេចមុខឧក្រិដ្ឋជនមួយក្រុមប្រដាប់ដោយអាវុធ ចូលមកភ្ជង់រំដោះអ្នកទោសបានសម្រេច។

បច្ចុប្បន្នកម្លាំងសមត្ថកិច្ចដកហូតបានរថយន្ត lexus RX330 និងអាវុធខ្លីចំនួន ៥ ដើម ហើយក៏កំពុងស្រាវជ្រាវករណីនេះយ៉ាងយកចិត្តទុកដាក់ ដើម្បីឈានទៅដល់ការឃាត់​ខ្លួនក្រុមឧក្រិដ្ឋជនខាងលើយកមកដាក់ទោសទៅតាម​ផ្លូវច្បាប់ផងដែរ៕

អត្ថបទ៖ កុសល