អគ្គិភ័យឆេះផ្ទះពលរដ្ឋមួយខ្នងទាំងស្រុង ដោយ​សារឆ្នាំងដាំបាយអគ្គិសនី

ផ្ទះប្រជាពលរដ្ឋមួយខ្នងត្រូវបានអណ្តាតភ្លើងឆាបឆេះទាំងស្រុង ខណ:ដែលម្ចាស់ផ្ទះបានដោយខ្សែភ្លើងឆ្នាំងដាំបាយអគ្គិសនីទុកចោលច្រើនម៉ោងពេក។

ហេតុការណ៍នេះបានកើតឡើងកាលពីថ្ងៃទី១២ ខែកញ្ញា ឆ្នាំ២០២៣ វេលាម៉ោង៩ព្រឹក នៅចំណុភូមិអង្រ្គង ឃុំជ្រៃ ស្រុកមោងឬស្សី ខេត្តបាត់ដំបង។ ករណីអគ្គិភ័យនេះបានកើតឡើងបណ្តាលឲ្យឆេះផ្ទះចំនួន១ខ្នង ទំហំ៤មx៦ម (ឆេះទាំងស្រុង) ដំបូលប្រក់ស័ង្កសី ជញ្ជាំងសង្កសី ផ្ទះផ្ទាល់ដី របស់ម្ចាស់ឈ្មោះ រ័ត្ន ណក់ ភេទប្រុស អាយុ៤៩ឆ្នាំ រស់នៅភូមិ ឃុំកើតហេតុខាងលេី។

បើតាមសម្តីរបស់ម្ចាស់ផ្ទះបានអះអាងថា ការឆាបឆេះនេះគឺសង្ស័យបណ្តាលមកពីគាត់ដោតឆ្នាំងដាំបាយខ្សែភ្លើងចោលយូរពេក ទើបបណ្តាលអោយក្លាយជាអណ្តាតភ្លើងឆាបឆេះបែបនេះ ដោយសម្ភារ:ខូចខាតរួមមាន៖
ឆេះលុយដុល្លារចំនួន ៣០០ដុល្លារ លុយបាតចំនួន ២៥.០០០បាត លុយខ្មែរចំនួន ១.៥០០.០០០រៀល ទូរស័ព្ទ២គ្រឿង ប៉ុស្តិ៍ផ្សារដែកចំនួន១ ម៉ូទរ័កាត់ចំនួន១ ប្រេងម៉ាស៊ុត២ប៊ីដុង អង្ករចំនួន១០០គីឡូក្រាម គ្រែចំនួន៤ និងសម្ភារៈប្រើប្រាស់មួយចំនួនទៀតឆេះទាំងស្រុង។ ក្នុងហេតុការណ៍នេះ សមត្ថកិច្ចមិនបានចេញរថយន្តពន្លត់អគ្គិភ័យទេ ដោយសារទទួលដំណឹងយឺតពេល៕

អត្ថបទ៖ សោ និយមរ័ត្ន