ឃាត់ខ្លួនក្រុមគប់កញ្ចក់រថយន្ដពីរនាក់បន្ទាប់ពីទទួលបានពាក្យបណ្ដឹងពីជនរងគ្រោះ

កម្លាំងនគរបាលនៃអធិការដ្ឋាននគរបាលក្រុង​ឧដុង្គ​ម៉ែ​ជ័យ នៃស្នងការដ្ឋាននរគរបាលខេត្តកំពង់ស្ពឺ បានធ្វើការស្រាវជ្រាវឃាត់ខ្លួនជនសង្ស័យចំនួនពីរនាក់ បន្ទាប់ពីទទួលបានពាក្យបណ្ដឹងពីជនរងគ្រោះពីករណីគប់កញ្ចក់រថយន្ដនៅសង្កាត់ព្រះស្រែ ក្រុងឧដុង្គម៉ែជ័យ។

ការឃាត់ខ្លួននេះបានធ្វើឡើងតាមពាក្យបណ្ដឹងរបស់ឈ្មោះ ឈីម បាន ភេទប្រុស អាយុ​៤៣ឆ្នាំ រស់នៅភូមិថ្នល់បន្ទាយ សង្កាត់ពន្សាំង ខណ្ឌព្រែក​ព្នៅ បន្ទាប់ពីត្រូវជនសង្ស័យពីរនាក់បានធ្វើសកម្មភាពយកដុំឥដ្ឋគប់កញ្ចក់រថយន្តរបស់ខ្លួន កាលថ្ងៃទី០៨ ខែវិច្ចិកា ឆ្នាំ២០២៣ វេលាម៉ោង២៣និង៣០នាទី នៅចំណុចលើផ្លូវបេតុ ស្ថិតនៅភូមិក្បាលអូរ សង្កាត់ព្រះស្រែ ក្រុងឧដុង្គម៉ែជ័យ ខេត្តកំពង់ស្ពឺ។

លោកវរសេនីយ៍ទោ​ ជុន​ សូឃួន​ អ​ធិការ​នៃអធិការដ្ឋាននគរបាល​ក្រុង​ឧដុង្គ​ម៉ែ​ជ័យ​ បានឲ្យដឹងថា ជនសង្ស័យដែលត្រូវឃាត់ខ្លួនមានឈ្មោះ គិត សាវុទ្ធ ភេទប្រុស អាយុ២២ឆ្នាំ រស់នៅភូមិក្បាលអូរ សង្កាត់ព្រះស្រែ ក្រុងឧដុង្គម៉ែជ័យ (ម្ចាស់ម៉ូតូ និងជាអ្នកបើកម៉ូតូ)​។ និងឈ្មោះ វ៉ិន សុភ័ក្ត ភេទប្រុស អាយុ១៩ឆ្នាំ រស់នៅភូមិក្បាលអូរ សង្កាត់ព្រះស្រែ ក្រុងឧដុង្គម៉ែជ័យ(អ្នកជិះពីក្រោយ)​។

លោកអ​ធិការបន្ថែមថា យោងតាមចម្លើយសារភាពរបស់ជនសង្ស័យទាំងពីរនាក់បានសារភាពថា កាលពីយប់ថ្ងៃទី៨ ខែវិច្ចិកា ឆ្នាំ២០២៣ វេលាម៉ោង១៨និង២០នាទី ខ្លួនបានជិះម៉ូតូម៉ាកCBR ពណ៌ក្រហម គ្មានផ្លាកលេខ នៅចំណុច​លើផ្លូវបេតុង ស្ថិតក្នុងភូមិក្បាលអូរ សង្កាត់ព្រះស្រែ និងបា​នយកដុំឥដ្ឋចោលទៅលើរថយន្ដមួយគ្រឿងមិនចាំម៉ាករួច​ជិះម៉ូតូ​គេចខ្លួន​តែម្ដង។

ក្រោយពីសាកសួរ កម្លាំងជំនាញបានកសាងសំណុំរឿង និងបញ្ជូនជនសង្ស័យខាងលើទៅស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធីច្បាប់៕

អត្ថបទ៖ សុខុម