ឃាត់ខ្លួនមនុស្ស៣នាក់ក្នុងយុទ្ធនាការត្រួតពិនិត្យអាវុធជាតិផ្ទុះនៅខេត្តព្រះសីហនុ

យុទ្ធនាការចុះត្រួតពិនិត្យអាវុធជាតិផ្ទុះចំនួន៥គោលដៅ នាយប់ថ្ងៃទី២៧ ខែកុម្ភៈ ឆ្នាំ២០២៤ នៅទូទាំងខេត្តព្រះសីហនុ កម្លាំងនគរបាលបានឃាត់ខ្លួនមនុស្សចំនួន៣នាក់ ផាកពិន័យចំនួន៤នាក់ ឃាត់ទុករថយន្ត៣គ្រឿង និងម៉ូតូ២គ្រឿង។

ក្នុងយុទ្ធនាការអនុវត្តត្រួតពិនិត្យអាវុធជាតិផ្ទុះចំនួន៥គោលដៅនេះ បានធ្វើនៅក្រុងព្រះសីហនុ ស្រុកព្រៃនប់ និងស្រុក ស្ទឹងហាវ លទ្ធផលបានធ្វេីការត្រួតពិនិត្យរថយន្ត តូច-ធំ ចំនួន ៦៧៤គ្រឿង ម៉ូតូ និងPassapp ចំនួន៣១៤គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមនេះសមត្ថកិច្ចបានពិនិត្យធ្វើតេស្ដជាតិអាកុល ចំនួន១១នាក់ រកឃេីញវិជ្ជមានចំនួន៥នាក់ (ផាកពិន័យតាមគោលការណ៍)។ ធ្វើតេស្តរកសារធាតុញៀន៣នាក់ (អវិជ្ជមាន)។ ត្រួតពិនិត្យអាវុធជាតិផ្ទុះលេីរថយន្តចំនួន ១៨៤គ្រឿង ( គ្មានអាវុធ ឆ្លងកាត់ )។ ឃាត់រក្សាទុករថយន្ត៣គ្រឿង (គ្មានបណ្ណបើកបរ និងបេីកបរក្នុងស្ថានភាពស្រវឹង) និងម៉ូតូ២​គ្រឿង​ (គ្មានស្លាកលេខ និងកែច្នៃសុីមាំង)។ ផាកពិន័យអ្នកបេីកបរម៉ូតូគ្មានមួកសុវត្ថិភាព ចំនួន៤នាក់ និងរថយន្ត៣​គ្រឿង។ ឃាត់ខ្លួនបាន ៣នាក់ ( ខ្មែរ ) ករណីរក្សាទុក ម្សៅក្រាមពណ៌សថ្លាសង្ស័យសារធាតុញៀន។

សូមបញ្ជាក់ថា ដោយអនុវត្តតាមការណែនាំរបស់លោក គួច ចំរើន អភិបាលខេត្តព្រះសីហនុ គណៈបញ្ជាការឯកភាពស្រុក ក្រុង ទាំង៥បានបើកយុទ្ធនាការជាប្រចាំថ្ងៃ ដោយបន្តចុះត្រួតពិនិត្យយានយន្តគ្រប់ប្រភេទដែលធ្វើចរាចរណ៍នៅលើផ្លូវសាធារណៈដោយក្នុងនោះក៏មានការផ្លាស់ប្តូរទីតាំងត្រួតពិនិត្យនៅតាមភូមិសាស្ត្រដែលចាំបាច់នៅលើដងផ្លូវដែលមានការធ្វើចរាចរណ៍ច្រើន ក្នុងគោលបំណង ដើម្បីកាត់បន្ថយគ្រោះថ្នាក់ចរាចរណ៍ និងស្វែងរកបទល្មើសផ្សេងៗ៕

អត្ថបទ៖ ស៊ុយ ចាន់ធា