បុគ្គលឈ្មោះ ដែន សូនី និងស្ត្រីរងគ្រោះបានចូលខ្លួនបំភ្លឺរួចហើយ រង់ចាំតែបទបញ្ចាពីថ្នាក់ដឹកនាំថាតើត្រូវអប់រំ ឬចាត់វិធានការច្បាប់

តាមការឲ្យដឹងពីលោកវរសេនីយ៍ឯក សំ វិច្ឆិកា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងនៅរសៀលថ្ងៃទី៤មេសានេះថា បុគ្គលឈ្មោះ ដែន សូនី ដែលប្រើអំពើហិង្សាលើស្ត្រីម្នាក់ ដែលត្រូវបានចែកចាយលើបណ្ដាញសង្គមនោះ បានចូលខ្លួនមកបំភ្លឺនៅចំពោះមុខសមត្ថកិច្ចរួចហើយ រង់ចាំតែបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញតែប៉ុណ្ណោះ ថាតើ ត្រូវអប់រំ ឬចាត់វិធានការច្បាប់។

បើតាមលោកវរសេនីយ៍ឯក សំ វិច្ឆិកា ភាគីទាំងពីរបានចូលខ្លួនមកបំភ្លឺតាមការកោះហៅរបស់សមត្ថកិច្ចរួចហើយនៅព្រឹកថ្ងៃទី៤ ខែមេសានេះ នៅស្នងការដ្ឋាននគរបាលរាជធានីភ្នំពេញ ហើយក៏បានសារភាពថា ពិតជាមានការប្រើអំពើហិង្សាពិតប្រាដកមែន តែករណីនេះបានកើតឡើងតាំងពីខែធ្នូ ឆ្នាំ២០២៣មកម្លេះ និងបានធ្វើកិច្ចសន្យាអប់រំបញ្ចប់បញ្ហានៅប៉ុស្ដិ៍នគរបាលវាលស្បូវ ខណ្ឌច្បារអំពៅរួចហើយដែរ។

អ្នកនាំពាក្យរូបនេះបន្ថែមថា តាមចម្លើយសារភាពរបស់ភាគីទាំងពីរ នៅថ្ងៃនោះគឺពិតជាមានការប្រើអំពើហិង្សាពិតប្រាកដមែន ប៉ុន្តែមិនបង្កជារបួសស្នាមធ្ងន់ធ្ងរនោះទេ ចំណែកពាក់ព័ន្ធការប្រើអំពើហិង្សានេះ គឺផ្ដើមចេញពីស្ដ្រីរងគ្រោះចូលទៅខមិនក្នុងហ្វេសប៊ុកផេកសង្សារបស់បុរសឈ្មោះ ដែន សូនី ដែលធ្វើឲ្យលោក ដែន សូនី ខឹងក៏ចូលទៅវាយដល់ក្នុងបន្ទប់តែម្ដង។

បើតាមលោកវរសេនីយ៍ឯក សំ វិច្ឆិកា មកដល់ពេលនេះនៅចំពោះមុខសមត្ថកិច្ចស្ត្រីរងគ្រោះមិនបានដាក់ពាក្យបណ្ដឹងលើបុគ្គលឈ្មោះ ដែន សូនី នោះទេ ដោយសុំបញ្ចប់បញ្ហាត្រឹមនេះ ប៉ុន្តែដោយសារការបង្ហោះចែកចាយនៅលើបណ្ដាញសង្គមធ្វើឲ្យមានការរិះគន់ពីមហាជន ដូចច្នេះកម្លាំងជំនាញត្រូវរង់ចាំបទបញ្ជាពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ថាតើ ត្រូវអនុវត្តវិធានអប់រំ ឬអនុវត្តវិធានការច្បាប់។

សូមបញ្ចាក់ថា បន្ទាប់ពីបែកធ្លាយ និងមានការផ្សព្វផ្សាយជាច្រើននៅលើបណ្ដាញសង្គមបុរសជនដៃដល់ និងនារីរគ្រោះបានចេញវីដេរួមគ្នាមួយ និងបានបកស្រាយថា នេះគ្រាន់តែជាការថតសម្ដែងតែប៉ុណ្ណោះ ហើយក៏បានកន្លងហួសមកយូរហើយដែរ។

តែទោះបីយ៉ាងណា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានតម្រូវឲ្យសាមីខ្លួនទាំងពីរត្រូវចូលខ្លួនមកបំភ្លឺនៅថ្ងៃទី៤មេសានេះជាកំហិត ព្រោះនេះជាពុលសង្គម៕

អត្ថបទ៖ សុខុម