ឆេះរាលដាល​ចម្ការស្វាយជាង ៣០ ហិចតា មិនដឹងមូលហេតុ

ចម្ការ​ស្វាយទំហំជាង ៨០ ហិចតា ត្រូវបានអណ្ដាតភ្លើងឆាបឆេះអស់ប្រហែល ៤០% គឺស្មើនឹងជាង 30 ហិចតា ខណៈ​សមត្ថកិច្ចកំពុងស្រាវជ្រាវ​មិន​ទាន់​កំណត់​រកមូលហេតុបាន​នៅឡើយ។

យោងតាមរបាយការណ៍ពី​សមត្ថកិច្ច អគ្គិភ័យដែលឆាបឆេះយ៉ាងសន្ធោសន្ធៅទៅលើព្រៃរបោះនិងដំណាំស្វាយធ្វើឲ្យភ្លឺរន្ទាលពេញផ្ទៃមេឃនោះ បានកើតឡើងកាលពីថ្ងៃទី ៨ ខែមេសា ឆ្នាំ២០២៤ វេលាម៉ោង ៤ និង ៤៥ នាទី ល្ងាច ស្ថិតនៅ​ចំណុចស្រែព្រីង ក្នុងភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង បង្កការភ្ញាក់ផ្អើលយ៉ាងខ្លាំងពីសំណាក់ប្រជាពលរដ្ឋដែលរស់នៅក្នុងតំបន់នោះ។

ចម្ការ​ស្វាយនេះជារបស់ឈ្មោះ ឡុង សយសុធី ភេទប្រុស រស់នៅក្រុងបាត់ដំបង។ ដីចម្ការ​មានទំហំ ប្រមាណ ៨០ ហិតា ឆេះអស់ប្រហែល ៤០% ដោយសមត្ថកិច្ចខេត្តបានចេញរថយន្តពន្លត់អគ្គីភ័យចំនួន ២ គ្រឿង រថយន្តស្រុកបាណន់ ១ គ្រឿង និង រថយន្តស្រុករតន:មណ្ឌល ១គ្រឿង។

ប៉ុន្តែ​ដោយសារ​ស្ថានភាពផ្លូវមានព្រៃស្តុក ផ្លូវចង្អៀត មិនអាចចូលបាន ហេតុនេះទើបសមត្ថកិច្ច​មិនបានប្រើប្រាស់ទឹកបាញ់​ពន្លត់​ទេ ដោយ​បានរកត្រាក់ទ័រមកឈូសទប់ស្កាត់កុំ​ឲ្យ​ភ្លើងឆេះរាលបន្តទៅទៀតបាន ១០០% ដោយប្រតិបត្តិការបានបញ្ចប់នៅវេលាម៉ោង ៨ និង ៣០ នាទី យប់។ សមត្ថកិច្ច​បញ្ជាក់ថា មូលហេតុមិនច្បាស់លាស់រង់ចាំការ​ស្រាវជ្រាវបន្តទៀត៕

អត្ថបទ៖ សោ និយមរ័ត្ន