នាយ​ការិយាល័យពន្លត់អគ្គិភ័យ ជំរុញឲ្យមន្ត្រីជំនាញចុះណែនាំពលរដ្ឋយល់ដឹងពីការប្រើប្រាស់ចរន្តអគ្គិសនី ដើម្បីទប់ស្កាត់គ្រោះអគ្គិភ័យ

លោកវរសេនីយ៍ឯក ព្រហ្ម យ៉ន នាយ​ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានជំរុញឲ្យមន្ត្រីជំនាញចំណុះការិយាល័យនគរបាលបង្ការពន្លត់អគ្គិភ័យ និងសង្គ្រោះ ត្រូវចុះណែនាំចុះផ្សព្វផ្សាយអប់រំប្រជាពលរដ្ឋឲ្យមានការយល់ដឹងអំពីបញ្ហាគ្រោះអគ្គិភ័យ និងការប្រើប្រាស់បំពង់ពន្លត់អគ្គិភ័យឲ្យបានត្រឹមត្រូវ ដើម្បីបង្ការទប់ស្កាត់គ្រោះអគ្គិភ័យ។

ការជំរុញបែបនេះបានធ្វើឡើងកាលពី១១ ខែមិថុនា ឆ្នាំ២០២៤ ក្នុងឱកាសដឹកនាំកិច្ចប្រជុំផ្សព្វផ្សាយអំពីវិន័យកងកម្លាំងនគរបាលជាតិ និងការចុះអប់រំណែនាំប្រជាពលរដ្ឋពាក់ព័ន្ធនឹងវិធានការការពារគ្រោះអគ្គិភ័យ ដោយមានការចូលរួមពីនាយរងការិយាល័យ នាយផ្នែក នាយរងផ្នែក និងមន្ត្រីជំនាញចំណុះការិយាល័យនគរបាលបង្ការពន្លត់អគ្គិភ័យ និងសង្គ្រោះ។

លោកនាយការិយាល័យ បញ្ជាក់ថា រាល់មន្ត្រីជំនាញទាំងអស់ ត្រូវយកចិត្តទុកដាក់ខ្ពស់អំពីការចុះណែនាំដល់បងប្អូនប្រជាពលរដ្ឋ ដើម្បីឲ្យប្រជាពលរដ្ឋមានការយល់ដឹងកាន់តែច្បាស់អំពីការប្រើប្រាស់វិធានការការពារ ជាពិសេស ត្រូវណែនាំប្រជាពលរដ្ឋយល់ដឹងអំពីការប្រើប្រាស់នូវចរន្តអគ្គិសនីឲ្យបានត្រឹមត្រូវ ព្រោះថាកន្លងមក ប្រជាពលរដ្ឋនៅមិនទាន់បានយល់ដឹងអំពីការប្រើប្រាស់ចរន្តអគ្គិសនីនៅឡើយទេ។ ជាមួយគ្នានេះ លោកនាយ​ការិយាល័យ ក៏បានផ្ដាំផ្ញើដល់មន្ត្រីជំនាញទាំងអស់ ក៏ត្រូវបង្កើនការយកចិត្តទុកដាក់ខ្ពស់ក្នុងរង្វង់ប្រតិបត្តិការរបស់ខ្លួនផងដែរ៕

អត្ថបទ៖ សុខុម