លោក នេត សាវឿន ផ្តល់បន្ទប់ទឹកថ្មីមួយដល់វត្តព្រះពុទ្ធមានបុណ្យ សម្រាប់ប្រើប្រាស់ជាប្រយោជន៍រួម

លោក នេត សាវឿន ឧបនាយករដ្ឋមន្ត្រី បានផ្តល់បន្ទប់ទឹកថ្មីធំមួយសម្រាប់សិស្សានុសិស្សក្នុងសាលាបឋមសិក្សាវត្តព្រះពុទ្ធ និងសម្រាប់ពុទ្ធិបរិស័ទ ប្រជាពលរដ្ឋទូទៅ អាចប្រើប្រាស់ជាប្រយោជន៍រួម។

លោក ថេង សុថុល អភិបាលខណ្ឌ៧មករា នាព្រឹកថ្ងៃទី១១ ខែកញ្ញា ឆ្នាំ២០២៤នេះ បានដឹកនាំក្រុមមន្ត្រីចុះសហការជាមួយគណៈគ្រប់គ្រងសាលាបឋមសិក្សា និងគណៈកម្មការវត្តព្រះពុទ្ធ ដើម្បីពិនិត្យសិក្សាពីទីតាំងដែលនឹងត្រូវកសាងបន្ទប់ទឹកថ្មីធំមួយ ដែលជាអំណោយដ៏ថ្លៃថ្លារបស់លោក នេត សាវឿន ។

បន្ទប់ទឹកដែលនឹងត្រូវសាងសង់នាពេលខាងមុខនេះ មានផ្ទៃទំហំ០៩ម៉ែត្រ គុណ១៤,៥ម៉ែត្រ ដែលសាងសង់ឡើងពីថ្មប្រក់ក្បឿង មានបន្ទប់សរុបចំនួន០៤ ( ប្រុស០២ ស្រី០២ ) ផ្លូវច្រកចូលមានផើងលាងសម្អាតដៃ រួចជាមួយនៅផ្នែកខាងក្រោយក៏មានកន្លែងបត់ជើងតូចមួយជួរទៀត សម្រាប់មនុស្សប្រុសផងដែរ ។

លោក ថេង សុថុល អភិបាលខណ្ឌ៧មករា ឱ្យដឹងថា បន្ទប់ទឹកជាអំណោយដ៏ថ្លៃថ្លៃរបស់ឧបនាយករដ្ឋមន្ត្រីនេះ នឹងផ្តល់ជាសារប្រយោជន៍រួម បម្រើដល់ការប្រើប្រាស់ឱ្យបានទូលំទូលាយ ទាំងសម្រាប់សិស្ស ព្រះសង្ឈ ពលរដ្ឋ និងពុទ្ធិបរិស័ទ ។ អំណោយនេះ ជាការសាងសង់ថ្មីបន្ថែម លើបន្ទប់ទឹកមានស្រាប់នៅក្នុងវត្តអារាម និងសាលារៀន ដើម្បីជាការបន្ថែមលើតម្រូវការប្រើប្រាស់ឱ្យបានកាន់តែគ្រប់គ្រាន់។

ប្រជាពលរដ្ឋ អាណាព្យាបាលសិស្សក្នុងសាលា គណៈនាយកលោកគ្រូអ្នកគ្រូក្នុងសាលា គណៈសង្ឈទូទាំងវត្តព្រះពុទ្ធមានបុណ្យ រួមជាមួយពុទ្ធិបរិស័ទ បានសម្តែងក្តីរីករាយពេញចិត្ត និងសាទរចំពោះការផ្តល់អំណោយរបស់លោកឧបនាយករដ្ឋមន្ត្រី ដែលនេះជាការសបញ្ជាក់ពីសណ្តានចិត្តដ៏ប្រពៃថ្លៃថ្លាប្រកបដោយគុណធម៌ មេត្តាធម៌ និងសធាចិត្តបុណ្យរបស់លោកសម្រាប់ការប្រើប្រាស់ជាប្រយោជន៍រួមមួយ ដល់មនុស្សម្នាទូទៅផងដែរ៕

អត្ថបទ៖ សុភា