នគរបាលខណ្ឌពោធិ៍សែនជ័យ ឃាត់ខ្លួនជនជាតិ​ចិន៤នាក់ បន្ទាប់ពីបង្កហិង្សាក្នុងហាងខារ៉ាអូខេ

ជនជាតិចំនួន២ក្រុមបានទាស់ពាក្យសម្តីគ្នារហូតឈានដល់ការបង្កហិង្សាវាយតប់គ្នា នៅក្នុងហាងខារ៉ាអូខេ KTV យីហោ ស៊ីង ម៉ាក្រូ បង្កភ្ញាក់ផ្អើលដល់អធិការខណ្ឌពោធិ៍សែនជ័យដឹកនាំកម្លាំងចុះអន្តរាគមន៍ឃាត់ខ្លួនបានចំនួន៤នាក់ យកមកសួរនាំ។

ករណីខាងលើនេះ បានកើតឡើងនៅ​វេលា​ម៉ោង​៨និង​៤៥នាទី​ ថ្ងៃ​ទី២៤ ខែកញ្ញា ឆ្នាំ២០២៤ ស្ថិតនៅបណ្តោយផ្លូវជាតិលេខ៤ ចំណុច​ភូមិ​ព្រៃ​ព្រីង​ជេីង​ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មាន​ពី​បុគ្គលិក​បំរើ​ការ​នៅហាងខារ៉ាអូខេខាង​លើ​បានឲ្យដឹងថា នៅមុនពេលកើតហេតុមានបុរសជនជាតិចិនមានគ្នាប្រមាណជា៤នាក់ បាននាំគ្នាចូលមកផឹកស៊ីហាងខារ៉ាអូខេរបស់ខ្លួនដោយមានសភាពស្រវឹងពីខាងក្រៅរួចទៅហើយ។ ប្រភពបន្ថែមថា ខណៈដែលក្រុមជនជាតិចិនទាំងនោះដើរចូលទៅដល់ខាងក្នុង និងនាំគ្នាឡើងតាមជណ្តើរយន្តក៏ស្រាប់តែទាស់ពាក្យសម្តីជាមួយភាគីជនជាតិចិនមួយក្រុមទៀត ក៏បង្កជាហិង្សាវាយប្រតាយប្រតបទៅវិញទៅមកបណ្ដាល​អោយ​មាន​អ្នក​រង​របួស​បែក​ក្បាល​ម្នាក់​ហូរ​ឈាម​។ ភ្លាមនោះដែរអ្នកបំរើការនៅខាងក្នុងបានរាយការណ៍ទៅសមត្ថកិច្ចមូលដ្ឋានចុះមកជួយអន្តរាគមន៍ភ្លាមៗ។

បន្ទាប់ពីទទួលបានព័ត៌មាន លោក ម៉ន វុទ្ធី អធិការនៃអធិការដ្ឋាននគរបាលខណ្ឌពោធិ៍សែនជ័យ បានដឹកនាំកម្លាំងចុះអន្តរាគមន៍ដល់កនន្លែងកើតហេតុ និងឃាត់ខ្លួន​ជនជាតិចិន​ចំនួន​៤នាក់ដើម្បីយកទៅសួរនាំ​តាមនីតិវិធី៕

អត្ថបទ៖ សំណាង