ACU​ ចាប់ខ្លួនមន្ត្រីរដ្ឋបាលសាលាខេត្តតាកែវបីនាក់​ ក្រោយរកឃេីញភាពមិនប្រក្រតីមួយចំនួន

មនុស្សចំនួន៣នាក់ដែលជាមន្រ្តីរដ្ឋបាលសាលាខេត្តតាកែវ ត្រូវបានចាប់ឃាត់ខ្លួនក្រោយអង្គភាពប្រឆាំងអំពេីពុករលួយបេីកការស៊េីអង្កេត និងរកឃេីញភាពមិនប្រក្រតីមួយចំនួនក្នុងការបំពេញតួនាទីរបស់ខ្លួន។

មនុស្សទាំង៣នាក់ដែលត្រូវបានឃាត់ខ្លួនមានលោក ហេង វុទ្ធី នាយកទីចាត់ការ និងផែនការវិនិយោគរបស់សាលាខេត្តតាកែវ និងមន្ត្រីជំនិតលោក២នាក់ទៀត គឺលោក ម៉ម វិចិត្រ និងឈ្មោះ យន់​ សុផុន​ មន្រ្តីទីចាត់ការផែនការវិនិយោគ ត្រូវបានអង្គភាពប្រឆាំងពុករលួយបានឃាត់ខ្លួន។

តាមការប​ញ្ជក់​ពីលោក ឯក ឆេងហួត ព្រះរាជអាជ្ញាអមសាលាតំបូងខេត្តតាកែវ ប្រាប់បណ្តាញព័ត៌មានក្នុងស្រុកមួយចំនួនឱ្យដឹងនៅល្ងាចថ្ងៃទី៧ ខែវិច្ឆិកា ឆ្នាំ២០២៤នេះថា មន្ត្រីសាលាខេត្តតាកែវ ទាំង៣នាក់ បានបញ្ជូនទៅដល់ពន្ធនាគារខេត្តតាកែវរួចហើយ។

លោកបន្ថែមថា​ ពួកគេត្រូវបានឃាត់ខ្លួនកាលពីថ្ងៃទី៥ ខែវិច្ឆិកា ឆ្នាំ២០២៤ និងបានរកឃើញថា បានជាប់ពាកព័ន្ធពាក់ព័ន្ធនឹងបទរំលោភអំណាច និងភាពមិនប្រក្រតីមួយចំនួនពេលបំពេញភារកិច្ច៕​

អត្ថបទ៖ វីរៈ