អាជ្ញាធរខណ្ឌបឹងកេងកង អ៊ុតកៅស៊ូបន្ថែមលើផ្លូវលេខ៣២២ ដើម្បីសម្រួលដល់ការធ្វើដំណើររបស់ពលរដ្ឋ

ជង្ហុកជាច្រើនកន្លែង និងមានទឹកដក់លើផ្លូវលេខ៣២២ កែងផ្លូវព្រះមុនីវង្ស ត្រូវបានអាជ្ញាធរខណ្ឌបឹងកេងកងធើ្វការអ៊ុតកៅស៊ូឡើងវិញ ដើម្បីសម្រួលដល់ការធ្វើដំណើររបស់ប្រជាពលរដ្ឋ និងលើកសោភ័ណភាពតាមដងផ្លូវផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមបញ្ជាក់ថា បើតាមលោក សុខ សម្បត្តិ អភិបាលនៃគណអភិបាលខណ្ឌបឹងកេងកង បានប្រាប់អោយដឹងថា ចំពោះកំណាត់ផ្លូវកំពុងរងការខូចខាតនេះ គឺស្ថិតនៅក្នុងគម្រោងអភិវឌ្ឍន៍សង្កាត់ឆ្នាំ២០២៤ របស់រដ្ឋបាលខណ្ឌបឹងកេងកង។

លោក លី ដែន ជាពលរដ្ឋតែងតែធ្វើដំណើរឆ្លងកាត់តំបន់នេះមានចិត្តសប្បាយរីករាយសាទរចំពោះអាជ្ញាធរមូលដ្ឋាន តែងយកចិត្តទុកដាក់ពីផលលំបាករបស់ប្រជាពលរដ្ឋគិតគូរតាំងពីការធ្វើដំណើររបស់ពលរដ្ឋ ការរស់របស់ពលរដ្ឋ និងសុខសុវត្ថិភាព។

លោក ហេង ពិសិដ្ឋ អភិបាលរងខណ្ឌបឹងកេងកងបានលើកឡើងថា ចំពោះផ្លូវមួយខ្សែនេះអាជ្ញាធរបានធើ្វការអ៊ុតជាប្រភេទកៅស៊ូមានទទឹង៨ម៉ែត្រ មានប្រវែង១៥០ម៉ែត្រ ចំពោះជង្ហុកតូចៗត្រូវបានចាក់បំពេញរួចហើយ។ លោកបានបន្ថែមទៀតថា សម្រាប់កន្លែងដែលនៅសេសសល់ នឹងធ្វើការអភិវឌ្ឍន៍ចាក់កៅស៊ូបន្ថែមនៅក្នុងគម្រោងអភិវឌ្ឍន៍សង្កាត់ឆ្នាំ ២០២៥ រហូតដល់ចំណុចផ្លូវលេខ៦៣ នាពេលខាងមុននេះ។

ជាមួយគ្នានេះដែរ ប្រជាពលរដ្ឋក៏បានសំណូមពរអាជ្ញាធរបន្ថែមថា សូមជួយត្រួតពិនិត្យចំពោះការដ្ឋានកំពុងសាងសង់ បានយកដីចំណីផ្លូវដាក់សម្ភារៈលើផ្លូវ ដែលធ្វើអោយបាត់បង់នូវផ្លូវសម្រាប់ថ្មើរជើងបាត់ទៅហើយ៕

អត្ថបទ៖ ម៉េង