សមត្ថកិច្ចក្តាប់មុខសញ្ញាជនដៃដល់បាញ់អ្នកសារព័ត៌មាន ម្នាក់នៅស្រុកជីក្រែង បានហើយ

សមត្ថកិច្ចស្រុកជីក្រែង បានបញ្ជាក់ថា អស់រយៈពេលជាង ១០ម៉ោង មកនេះ កម្លាំងនគរបាលជំនាញបានបើកការស្រាវជ្រាវរហូតក្តាប់បានមុខសញ្ញាជនដៃដល់ដែលលួចបាញ់ប្រហារទៅលើអ្នកសារព័ត៌មានម្នាក់បណ្ដាលឱ្យរងរបួសនោះបានហើយ។

សមត្ថកិច្ចស្រុកជីក្រែង បានឱ្យដឹងថា លោក ឈឿង ឈឹង ជាអ្នកសារព័ត៌មាន របស់អង្គភាព កម្ពុជាអភិវឌ្ឍន៍ ត្រូវបានខ្មាន់កាំភ្លើងលួចបាញ់ប្រហារ បណ្ដាលឱ្យរងរបួសយ៉ាងធ្ងន់ធ្ងរ នៅភូមិត្រពាំងភ្លោះ ឃុំពង្រលើ ស្រុកជីក្រែង ខេត្តសៀមរាប នៅវេលាម៉ោង ១៨៖០០នាទី ថ្ងៃទី៤ ខែធ្នូ ឆ្នាំ២០២៤ នេះ។ សមត្ថកិច្ចបន្តថា បន្ទាប់ពីទទួលបានព័ត៌មាននេះភ្លាម កម្លាំងនគរបាលស្រុកជីក្រែង បានចុះទៅដល់ទីតាំងកើតហេតុ នឹងបានដឹកជនរងគ្រោះមកមន្ទីរពេទ្យ ដោយមានការការពារត្រឹមត្រូវរហូតដល់ទីរួមខេត្ត។

សមត្ថកិច្ចបន្ថែមថា ករណីនេះ គឺអ្នកសារព័ត៌មានចុះទៅយកព័ត៌មាននៅតំបន់ព្រៃស្ងាត់ ត្រូវជនដៃដល់លួចបាញ់ប្រហារដោយកាំភ្លើងខ្យល់ បណ្ដាលឱ្យរងរបួស។ បច្ចុប្បន្នកម្លាំងនគរបាលស្រុកចង្រែងនិងនគរបាលខេត្តសៀមរាបបានក្តាប់មុខសញ្ញាជនដៃដល់នោះបានហើយ

លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្ត បានឱ្យដឹងដែរថា លោកបានបញ្ជារឱ្យកម្លាំងជំនាញ ចុះទៅកាន់ទីតាំងកើតហេតុដើម្បីស្រាវជ្រាវជាបន្ទាន់ផងដែរ៕

ដោយ៖ជុន កុសល