អាជ្ញាធរខណ្ឌបឹងកេងកង ឆ្មក់បង្ក្រាប់ទីតាំងល្បែងស៊ីសងមួយកន្លែង ឃាត់ខ្លួនមនុស្សប្រុសស្រី៤នាក់

ទីតាំងបើកល្បែងស៊ីសងមួយកន្លែងដែលបង្កប់ដោយល្បីស៊ីសងខុសច្បាប់គ្រប់ប្រភេទត្រូវកម្លាំងគណៈបញ្ជាការឯកភាពខណ្ឌបឹងកេងកង ឆ្មក់ចុះបង្ក្រាបឃាត់ខ្លួនមនុស្ស០៤នាក់ និងដកហូតសម្ភារៈមួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះបានធ្វើនៅថ្ងៃទី៩ ខែធ្នូ ឆ្នាំ២០២៤ ដឹកផ្ទាល់ដោយលោក សុខ សម្បត្តិ អភិបាលនៃគណៈអភិបាលខណ្ឌបឹងកេងកង និងជាប្រធានគណៈបញ្ជាការឯកភាពខណ្ឌបឹងកេងកង ចុះបង្ក្រាបទីតាំងមួយកន្លែងដែលស្ថិតនៅតាមបណ្ដោយផ្លូវលេខ២៩៨ កែងផ្លូវលេខ ១៨៩ ក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

តាមប្រភពព័ត៌មានបានឲ្យដឹងថា ទីតាំងនេះបានបើកបង្កប់ល្បែងស៊ីសងគ្រប់ប្រភេទ រួមមាន ភ្នាល់បាល់ មាន់ជល់​អនឡាញ និងឡូតូតូចធំ ដែលមានមនុស្សចេញចូលពពាក់ពពូនទាំងយប់ទាំងថ្ងៃបង្កភាពអសន្តិសុខដល់ប្រជាពលរដ្ឋដែលមានផ្ទះនៅក្បែរនោះ ដូច្នេះប្រជាពលរដ្ឋសំណូមពរដល់អាជ្ញាធរគួរមានវិធានការ ហើយថ្នាក់នាំក៏ទើបចេញសារាចរថ្មីផងនោះ អាជ្ញាធរខណ្ឌបឹងកេងកង ឆ្មក់ចុះបង្ក្រាបជាក់ស្ដែងតែម្ដង ដោយដកហូតបានកុំព្យូទ័រភ្នាល់តាមប្រព័ន្ធអន​ឡាញ​បានចំនួន ០៤គ្រឿង និងឃាត់ខ្លួនបានអ្នកលេងល្បែងស៊ីសងចំនួន២នាក់ និងអ្នកទទួលចាក់ភ្នាល់ល្បែងស៊ីសងស្រីចំនួនពីរនាក់ផងដែរ។

ក្រោយប្រតិបត្តិការកម្លាំងអាជ្ញាធរបាននាំយកសម្ភារៈ និងមនុស្សទាំង០៤នាក់ទៅអធិការដ្ឋាននគរបាលខណ្ឌបឹងកេងកងដើម្បីចាត់ការតាមនីតិវិធីបន្ត។ ចំណែកឯទីតាំងត្រូវបានបិទជាបណ្ដោះសន្ន។

គួរបញ្ជាក់ផងដែរ កាលពីថ្ងៃទី០៤ ខែធ្នូ ឆ្នាំ២០២៤ ក្រសួងមហាផ្ទៃ បានចេញសារាចរណែនាំ ឱ្យបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ នៅលើបណ្តាញទំនាក់ទំនងសង្គម ព្រោះការផ្សព្វផ្សាយនោះ បានធ្វើឱ្យប៉ះពាល់ធ្ងន់ធ្ងរ ដល់សន្តិសុខសណ្តាប់ធ្នាប់សាធារណៈ និងសុវត្ថិភាពសង្គម។ បន្ទាប់ពីទទួលបានសារាចរណែនាំខាងលើនេះរួចមក អគ្គស្នងការនគរបាលជាតិ បានដាក់ឱសានវាទ ត្រឹមថ្ងៃ១០ធ្នូ ឱ្យអ្នកប្រើប្រាស់បណ្តាញទំនាក់ទំនងសង្គម ប្រព័ន្ធផ្សព្វផ្សាយ អ្នកផលិតមាតិកាសង្គម ក៏ដូចជាបុគ្គលមានប្រជាប្រិយមួយចំនួន ធ្វើការលុបចោលព័ត៌មានល្បែងអនឡាញពីបណ្តាញសង្គម បើមិនដូច្នេះ សមត្ថកិច្ចនឹងចាត់វិធានការទៅតាមផ្លូវច្បាប់ជាធរមាន៕

អត្ថបទ៖ សុភា