ភ្លើងឆេះព្រៃរាលដាលដល់ចម្ការស្វាយ ៣៥ហិកតា ខូចខាតដើមស្វាយ ១៥ ០០០ ដើម

ដើមស្វាយកែវល្មៀតប្រមាណ ១៥.០០០ ដើម ត្រូវបានភ្លើងឆេះរោលរាលបណ្ដាលឲ្យខូចខាតគ្មានសល់ បន្ទាប់ពីមានភ្លើងឆេះព្រៃឆេះរៀលចូលមកដល់ចម្ការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីអគ្គិភ័យនេះបានកើតឡើងនៅថ្ងៃទី៨ ខែមករា ឆ្នាំ២០២៥ វេលាម៉ោង១៣និង៣០នាទីថ្ងៃត្រង់ នៅចំណុចភ្នំស្លឹក ស្ថិតក្នុងភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង។ ករណីភ្លើងឆេះព្រៃរាលចូលចម្ការស្វាយនេះ គឺបណ្តាលឲ្យខូចខាតដើមស្វាយលើផ្ទៃដីទំហំ ៣៥ហិកតា របស់ម្ចាស់ឈ្មោះ ង៉ូវ មួយហៀង ភេទស្រី អាយុ៦០ឆ្នាំ មានទីលំនៅ នៅរាជធានីភ្នំពេញ។

ភ្លាមៗនោះ ក្រោយពីបានទទួលព័ត៌មាន សមត្ថកិច្ចជាច្រើនស្រុកបានសហការចេញរថយន្តពន្លត់អគ្គិភ័យ ដើម្បីជួយអន្តរាគមន៍ ក្នុងនោះមានរថយន្តរបស់អធិការដ្ឋានស្រុកបាណន់ ១គ្រឿង រថយន្តអធិការដ្ឋានស្រុកសំទ្បូត ១គ្រឿង រថយន្តរបស់អធិការដ្ឋានស្រុករតនមណ្ឌល ១គ្រឿង និងរថយន្តស្នងការខេត្តចំនួន ២គ្រឿង សរុបចំនួន ៥គ្រឿង បានចេញប្រតិបត្តិការ និងទប់ស្កាត់មិនឲ្យរាលដាលបន្ត។

បើតាមការចុះពិនិត្យ និងសន្និដ្ឋានរបស់សមត្ថកិច្ចជំនាញបានបញ្ជាក់ថា បញ្ហានេះគឺបានកើតឡើងដោយសារភ្លើងឆេះព្រៃរាលដាលចូលដល់ចម្ការ និងបណ្ដាលឲ្យខូចខាតដើមស្វាយចំនួនប្រមាណ ១៥.០០០ ដើម ដែលករណីនេះដែរសមត្ថកិច្ចកំពុងធ្វើការស្រាវជ្រាវ៕

អត្ថបទ៖ សោ និយមរ័ត្ន