ព័ត៌មានបន្ថែម៖ រកឃើញជនរងគ្រោះ៩នាក់ ក្នុងនោះ៤នាក់ស្លាប់ និង៥នាក់របួស

លោកឧត្ដមសេនីយ៍ឯក នេត វន្ថា ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានប្រាប់ឲ្យដឹងនៅមុននេះបន្តិចថា គិតត្រឹមម៉ោង១១និង៥៣នាទីនេះ ហេតុការណ៍គ្រោះអគ្គិភ័យឆេះក្លឹបនៅជិតវត្តឬស្សីសាញ់ ក្នុងមូលដ្ឋានសង្កាត់ដង្កោ ខណ្ឌដង្កោ កម្លាំងជំនាញបានរកឃើញជនរងគ្រោះចំនួន៩នាក់ ហើយក្នុងចំណោមជនរងគ្រោះទាំង៩នាក់នោះ មាន៤នាក់ស្លាប់នៅកន្លែងកើតហេតុ ខណៈ៥នាក់ទៀតកំពុងបញ្ជូនទៅសង្គ្រោះនៅមន្ទីរពេទ្យ។

លោក នេត វន្ថា បន្ថែមថា នៅពេលនេះកម្លាំងជំនាញកំពុងបន្តរុករកនៅក្នុងគំនរបាក់បែក ដើម្បីស្វែងរកជនរងគ្រោះបន្ថែម។

សូមបញ្ជាក់ថា ករណីអគ្គិភ័យនេះបានកើតឡើងនៅវេលាម៉ោង១០និង៣៥នាទី ព្រឹកថ្ងៃទី៥ ខែកុម្ភៈ ឆ្នាំ២០២៥ នៅចំណុចក្លឹបកម្សាន្ដ មីតណាយ ព្រីមៀរ នៅតាមបណ្ដោយផ្លូវ៥០ម៉ែត្រ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។ ទោះបីយ៉ាងណាគេនៅមិនទាន់ដឹងពីមូលហេតុនៃការឆាបឆេះនោះទេ ខណៈកម្លាំងជំនាញបង្ការពន្លត់អគ្គិភ័យ និងសង្គ្រោះនៃអគ្គស្នងការដ្ឋាននគរបាលជាតិ កំពុងអន្តរាគមន៍នៅកន្លែងកើតហេតុ៕