ស្នងការខេត្តបន្ទាយមានជ័យ ជំរុញឲ្យពលរដ្ឋដាក់ពាក្យបណ្ដឹង ក្រោយគណនីហ្វេសប៊ុកមួយយករូបថតទៅផ្សព្វផ្សាយរឿងកម្ចីអនឡាញ

ស្នងការដ្ឋាននគរបាលខេត្តបន្ទាយមានជ័យ បានជំរុញឲ្យប្រជាពលរដ្ឋដែលត្រូវបានក្រុមកម្ចីអនឡាញខុសច្បាប់យករូបថតទៅបង្ហោះផ្សព្វផ្សាយនៅលើបណ្ដាញសង្គម មកដាក់ពាក្យបណ្ដឹងនៅស្នងការដ្ឋានខេត្ត ឬតាមបណ្ដាអធិការដ្ឋាន ក្រុង ស្រុក ដើម្បីកម្លាំងជំនាញអនុវត្តវិធានការច្បាប់។

បើតាមសេចក្តីបំភ្លឺព័ត៌មានរបស់ស្នងការដ្ឋាននគរបាលខេត្ត គណនីហ្វេសប៊ុកឈ្មោះ “Vy Rika” ជាប្រភេទគណនីហ្វេសប៊ុកក្លែងក្លាយ (fake account) ពុំមានអត្តសញ្ញាណ ឬអាសយដ្ឋានរបស់អ្នកប្រើប្រាស់ពិតប្រាកដឡើយ និងជាបក្ខពួករបស់ក្រុមហ៊ុនកម្ចីប្រាក់អនឡាញខុសច្បាប់ ដោយបង្កើតឡើងក្នុងគោលបំណងបង្ហោះ (post) នូវរូបភាពរបស់ប្រជាពលរដ្ឋភ្ជាប់ជាមួយការសរសេរខ្លឹមសារដើម្បីបរិហារកេរ្តិ៍។

តាមសេចក្តីបំភ្លឺ​ មកដល់ពេលនេះ កម្លាំងជំនាញបានទទួលបណ្តឹងពីជនរងគ្រោះជាបន្តបន្ទាប់ និងអំពាវនាវដល់ជនរងគ្រោះផ្សេងទៀតមកដាក់ពាក្យបណ្តឹងនៅស្នងការដ្ឋាននគរបាលខេត្ត ឬនៅតាមបណ្តាអធិការដ្ឋាននគរបាលក្រុង ស្រុក ដើម្បីចាត់ការតាមនីតិវិធី ។

សូមជម្រាបថា នាពេលថ្មីនេះ គណនីហ្វេសប៊ុកឈ្មោះ “Vy Rika” បានយករូបថតប្រជាពលរដ្ឋជាច្រើនទៅបង្ហោះផ្សព្វផ្សាយនៅលើបណ្ដាញសង្គមដោយភ្ជាប់ជាមួយខ្លឹមសារថា «ពួកអារួមគំនិត ជនបោកប្រាស់ ជនពាក់ព័ន្ធ» ដែលទង្វើនេះ គឺជាការ បរិហារកេរ្តិ៍ នៅលើបណ្ដាលសង្គមជាសាធារណៈ៕

អត្ថបទ៖ អ ពៅ