មន្ត្រីជំនាញកំពុងស្រាវជ្រាវរកអ្នកផ្សព្វផ្សាយកៀរ​គរសប្បុរសជនយកបច្ច័យចូលបុណ្យសពនាយទាហាន​ដែលបាត់បង់ជីវិតក្នុងន័យឆបោក

នាយកដ្ឋានប្រឆាំងបទល្មើសបច្ចេកវិទ្យា នៅរសៀលថ្ងៃទី៣០ ខែឧសភា ឆ្នាំ២០២៥នេះ បាននិងកំពុងធ្វើការកំណត់ និងស្រាវជ្រាវរកគណនី ឬទំព័រហ្វេកមួយចំនួន ដែលផ្សព្វផ្សាយកៀរគរសប្បុរសជនឲ្យចូលរួមជាបច្ច័យបុណ្យសពនាយទាហានដែលបាត់បង់ជីវិត ក្នុងព្រឹត្តិការប៉ះទង្គិចគ្នារវងកងទ័ពថៃ និងកម្ពុជា ក្នុងន័យឆបោក ដើម្បីមានចំណាត់ការតាមផ្លូវច្បាប់។

ការប្រកាសលើចំណាត់ការនេះ បន្ទាប់ពីពេលថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា សង្កេតឃើញមានការផ្សព្វផ្សាយតាមគណនីបណ្តាញទំនាក់ទំនងសង្គមជាច្រើន ក្នុងការកៀរគរសប្បុរសជនចូលរួមជាបច្ច័យជូនដល់គ្រួសារនៃសពកងទ័ពម្នាក់ដែលពលីជីវិត និងកៀរគរថវិកាពីសប្បុរសជនឲ្យចូលរួមឧបត្ថម្ភជាគ្រឿងឧបភោគ បរិភោគ និងសម្ភារៈផ្សេងៗ ជូនដល់កងទ័ពជួរមុខដែលកំពុងឈរជើងការពារតាមបន្ទាត់ព្រំដែន។

បើតាមនាយកដ្ឋានប្រឆាំងបទល្មើសបច្ចេកវិទ្យា បច្ចុប្បន្ននាយកដ្ឋានកំពុងធ្វើការកំណត់ និងស្រាវជ្រាវថាតើគណនី ឬទំព័រហ្វេកណាខ្លះ ដែលផ្សព្វផ្សាយមានគោលបំណងឆបោកសប្បុរជន ដើម្បីមានចំណាត់ការតាមផ្លូវច្បាប់។ នាយកដ្ឋានក៏បានអំពាវនាវដល់សាធារណជនមេត្តាប្រុងប្រយ័ត្នខ្ពស់ចំពោះការចូលរួមថវិការផ្សេងៗ ក្នុងនាមជាសប្បុរសជន ក្រោមរូបភាពកៀរករថវិការដែលគ្មានប្រភពផ្លូវការច្បាស់លាស់៕