ច្រកអន្តរជាតិកម្ពុជា ថៃ ក្នុងភូមិសាស្ត្រខេត្តបាត់ដំបង បើកដំណើរការធម្មតា

មួយរយៈកន្លងមកនេះ ពិសេសគឺចាប់តាំងពីមានការប៉ះទង្គិចគ្នារវាងកងទ័ពកម្ពុជា ថៃ នៅឯខេត្តព្រះវិហាររួចមក ក៏មានព័ត៌មានមួយចំនួនបានផ្សព្វផ្សាយថា ទាំងច្រកអន្តរជាតិ ច្រកតំបន់ និងច្រករបៀងទាំងអស់តាមបណ្ដោយព្រំដែនកម្ពុជា ថៃ នឹងត្រូវបិទទាំងស្រុង ដែលព័ត៌មាននេះបានធ្វើឲ្យក្រុមអាជីវករ និងអ្នករកស៊ីតាមច្រកនីមួយៗ មិនថាប្រជាពលរដ្ឋខ្មែរ ឬប្រជាពលរដ្ឋថៃនោះទេ បានបញ្ចេញនូវការព្រួយបារម្ភអំពីមុខរបររបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទុយទៅវិញនៅព្រឹកថ្ងៃទី២ ខែមិថុនា ឆ្នាំ២០២៥ នេះ គេសង្កេតឃើញថា នៅច្រកអន្តរជាតិភ្នំដី ស្ថិតក្នុងស្រុកសំពៅលូន ច្រកអន្តរជាតិដូង ស្ថិតក្នុងស្រុកកំរៀង និងច្រកតំបន់មួយចំនួនក្នុងស្រុកកំរៀង ស្រុកភ្នំព្រឹក និងស្រុកសំឡូត តាមខ្សែបន្ទាត់ព្រំដែនខេត្តបាត់ដំបង គឺពុំមានការបិទច្រកណាមួយនៅឡើយទេ ដោយមានប្រជាពលរដ្ឋទាំងពីរប្រទេសឆ្លងចេញចូលជាធម្មតា អាជីវករដឹកទំនិញនិងបន្លែបង្កា ក៏នៅតែធ្វើសកម្មភាពជាធម្មតា ដោយមិនទាន់ឃើញថា មានបទបញ្ជាខាងណាមួយដើម្បីឲ្យបិទច្រកទាំងស្រុងនោះឡើយ។

ប្រជាពលរដ្ឋនៅតាមបណ្ដោយព្រំដែនមួយចំនួនបានលើកឡើងថា ការប៉ះទង្គិចគ្នានៅឯខេត្តព្រះវិហារ គឺជារឿងកងកម្លាំងនិងកងកម្លាំង ដោយមិនមានពាក់ព័ន្ធអ្វីជាមួយនឹងអាជីវករ និងប្រជាពលរដ្ឋដែលរកស៊ីនៅតាមច្រកនីមួយៗនោះឡើយ ដូច្នេះវាមិនគួរថា ត្រូវបិទច្រកទាំងអស់នោះទេ ព្រោះវាជារឿងដាច់ដោយឡែកពីគ្នា។ ទោះបីជាមានព័ត៌មានលេចឮថានឹងត្រូវបិទច្រកទាំងអស់នៅពេលឆាប់ៗខាងមុខនេះក៏ដោយ ក៏បច្ចុប្បន្នច្រកទាំងអស់ដែលស្ថិតក្នុងទឹកដីខេត្តបាត់ដំបងជាមួយ ប្រទេសថៃ គឺមិនទាន់មានអ្វីប្រែប្រួលនៅឡើយទេ ដោយនៅដំណើរការជាធម្មតា ៕

អត្ថបទ៖ សោ និយមរ័ត្ន