ខេត្តរតនគិរី សិក្សាពង្រីកច្រកទ្វារព្រំដែនអន្តរជាតិ អូរយ៉ាដាវ គ្រោងចំណាយថវិកា ២០ លានដុល្លារ

ដោយមើលឃើញពីសក្តានុពលច្រកទ្វារព្រំដែនអន្តរជាតិ យូរយ៉ាដាវ ខេត្តរតនគិរី កំពុងរៀបចំផែនការ ពង្រីកច្រកនេះដើម្បីឱ្យកាន់តែទំនើប និងធំទូលាយ។ គម្រោងនេះ គ្រោងចំណាយថវិកាប្រមាណ ២០ លានដុល្លារ ហើយនឹងគ្របដណ្តប់លើផ្ទៃដី ២០ ហិកតា។

ក្នុងសន្និសីទស្តីពី វឌ្ឍនភាពការងារប្រចាំឆមាសទី ១ ឆ្នាំ ២០២៥ របស់រដ្ឋបាលខេត្តរតនគិរី នាថ្ងៃទី ១៥ ខែកញ្ញា ឆ្នាំ ២០២៥ លោក ញ៉ែម សំអឿន  អភិបាលខេត្តរតនគិរី បានបង្ហើបឱ្យដឹងថា ថ្នាក់ខេត្តកំពុងសិក្សាផែនការពង្រីកច្រកច្រកទ្វារព្រំដែនអន្តរជាតិ អូរយ៉ាដាវ ដែលស្ថិតនៅស្រុកអូរយ៉ាវ ជាប់ព្រំប្រទល់វៀតណាម។ លោកបញ្ជាក់ថា៖«ការគ្រប់គ្រងច្រកទ្វារព្រំដែនអន្តរជាតិ អូរយ៉ាដាវ ដែលជាច្រកសំខាន់ ថ្មីៗនេះយើងបានសិក្សាច្រកនេះ ដើម្បីពង្រីកបន្ថែមឱ្យច្រកនេះទំនើប ទំហំដី ២០ ហិកតា ដែលចំណាយថវិការហូតដល់ ២០ លានដុល្លារ»។

លោកបានអះអាងថា គម្រោងពង្រីកច្រកនេះ ដោយគិតថាជាច្រកសំខាន់ និងជាអនុតំបន់ពាណិជ្ជកម្មក្រៅប្រទេស ហើយសង្ឃឹមថានឹងមានទីតាំងច្រកដ៏ល្អមួយនេះនៅពេលដ៏ឆាប់ៗខាងមុខនេះ។ បើតាមលោកអភិបាលខេត្ត នៅច្រកអន្តរជាតិមួយនេះ មានភ្ញៀវចេញចូលសរុបជាង ៦ម៉ឺននាក់ ក្នុងនោះភ្ញៀវបរទេសចំនួន ជាង ៤ម៉ឺននាក់ ភាគច្រើនជនជាតិវៀតណាម ដោយសារគាត់មានការវិនិយោគច្រើននៅក្នុងខេត្តរតនគិរី និងខេត្តផ្សេងទៀត ។

ចំណែក ទំនិញនាំចេញមានជាង ៣៤ ៧៥០ តោន ក្នុងនោះរួមមានដំណាំកសិកម្ម កៅស៊ូ ចេក ស្វាយ ស្វាយចន្ទី ដំឡូងមី ជាដើម។ លើសពីនេះ មានទំនិញនាំចេញក្រៅផ្លូវការមានចំនួន ១៥ម៉ឺនតោន ដូចជា ល្ង ស្វាយ ស្វាយចន្ទី ដំឡូងឈើ និងកៅស៊ូបង្កក៕