សន្តិសុខសង្គម

ជនសង្ស័យ ហង្ស សំណាង និងបក្សពួក ០២ នាក់ ត្រូវតំណាងអយ្យការ បើកការស៊ើបសួរ ០៣ បទល្មើស

បានផុស

១ year មុន

នៅ

ថ្ងៃចន្ទ ២ មិថុនា ២០២៥

ដោយ

លោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានបញ្ជាក់ប្រាប់នារសៀលថ្ងៃទី ០២ ខែមិថុនា ឆ្នាំ ២០២៥ នេះថា ករណី ជនសង្ស័យ ហង្ស សំណាង អ្នកសារព័ត៌មានម្នាក់ រួមទាំងបក្សពួក ០២ នាក់ទៀត ត្រូវបានតំណាងអយ្យការបើកការស៊ើបសួរលើជនសង្ស័យទាំង ០៣ នាក់ ពីបទ ទី០១.ធ្វើឲ្យខូចទឹកចិត្តកងទ័ព , ទី០២.ញុះញង់ឲ្យមានការរើសអើង និងទី០៣.ប្រើប្រាស់ឯកសណ្ឋានជាអាទិ៍ ដែលមានភាពប្រហាក់ប្រហែលនឹងយោធា តាមមាត្រា ៤៧២ , ៤៩៤ , ៤៩៦ និង ៦១៦ នៃក្រមព្រហ្មទណ្ឌ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យទាំង ០៣ នាក់ រួមមាន ៖ ទី០១.ឈ្មោះ ហង្ស សំណាង ភេទប្រុស អាយុ ៤២ ឆ្នាំ ជនជាតិខ្មែរ , ទី០២.ឈ្មោះ កុញ វាសនា ហៅ ស្នា ភេទប្រុស អាយុ ៣៥ ឆ្នាំ ជនជាតិខ្មែរ និង ទី០៣.ឈ្មោះ រស់ អែវ ភេទប្រុស អាយុ ៦៣ ឆ្នាំ ជនជាតិខ្មែរ។

គួរបញ្ជាក់ផងដែរថា កាលពីថ្ងៃទី ៣០ ខែឧសភា ឆ្នាំ ២០២៥ ជនសង្ស័យទាំង ០៣ នាក់ បានបង្កើតមាតិកាបែបកំប្លែងចំអក សម្ដែងឈុតជាយោធាស្លៀកពាក់មិនសមរម្យ និងធ្វើកិច្ចសម្ភាសន៍ឌឺដង ញុះញង់ បំបាក់ទឹកចិត្ត និងស្មារតីយោធា ដែលទង្វើនេះ មិនមែនជាទម្រង់ នៃវិជ្ជាជីវៈអ្នកសារព័ត៌មានទេ ទើបត្រូវបានសមត្ថកិច្ចចាប់ខ្លួន៕

អត្ថបទ ៖ សុភា