បង្ក្រាបករណីជួញដូរគ្រឿងញៀន ឃាត់ខ្លួនជនសង្ស័យម្នាក់ រឹបអូសថ្នាំញៀនជាង៤គីឡូក្រាម

កម្លាំងជំនាញនៃមន្ទីរប្រឆាំងបទល្មើសគ្រឿងញៀន(ក១) សហការជាមួយកម្លាំងស្នងការដ្ឋានរាជធានីភ្នំពេញ បានស្រាវជ្រាវបង្ក្រាបករណីរក្សាទុកដឹកជញ្ជូន និងជួញដូរសារធាតុញៀនខុសច្បាប់ ឃាត់ខ្លួនជនសង្ស័យម្នាក់ ដកហូតថ្នាំញៀនជាង៤គីឡូក្រាម ។

ប្រតិបត្តិការនេះបានធ្វើឡើងកាលើពីថ្ងៃទី១៣ ខែមិថុនា ឆ្នាំ២០២៥ នៅចំណុចផ្លូវបេតុង៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ក្រោមការសម្របសម្រួលពីលោក គឹម ហុងសាន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។ នេះបើតាមរបាយការណ៍របស់អគ្គស្នងការដ្ឋាននគរបាលជាតិ បានឲ្យដឹងនៅព្រឹកថ្ងៃទី១៨មិថុនា នេះ។

ក្នុងប្រតិបត្តិការ កម្លាំងជំនាញបានចាប់ខ្លួនជនល្មើស ០១នាក់ ភេទប្រុស ជនជាតិខ្មែរ អាយុ៣២ឆ្នាំ និងដកហូតវត្ថុតាងគ្រឿងញៀនប្រភេទកេតាមីន (Ketamine) ទម្ងន់៧០៧.៥៩ ក្រាម, គ្រឿងញៀនប្រភេទអ៊ិចស្តាស៊ី (MDMA) ទម្ងន់ ២០៦៦,០៥ក្រាម, គ្រឿងញៀនប្រភេទ មេតំហ្វេតាមីន (WY,ICE) ទម្ងន់ ១២៩២.០៥ក្រាម សរុបរួមសារធាតុញៀនទម្ងន់ជាង៤គីឡូក្រាម។

បច្ចុប្បន្នជនល្មើស និងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕