Update៖ ករណីឆេះអាហារដ្ឋាន ពេជ្រ ចរណៃ ល្បុក្កតោ អស់សម្ភារស្ទើរទាំងស្រុង

អាហារដ្ឋានមួយកន្លែងដែលមានយីហោ អាហារដ្ឋាន ពេជ្រ ចរណៃ ល្បុក្កតោ ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្ដាលឲ្យខូចខាតសម្ភារនៅខាងក្នុងស្ទើរទាំងស្រុង ខណៈប្រភពមួយចំនួនបង្ហើបថា ករណីនេះបណ្ដាលមកពីជាងផ្សារដែកធ្លាក់កម្ទេចភ្លើង លើសាឡុង តែគេនៅមិនទាន់យកជាផ្លូវការនោះទេ។

បើតាមការបញ្ជាក់ពីពលរដ្ឋបានអោយដឹងថា មុនកើតហេតុគេបានធុំក្លិនឈ្ងៀម និងមានផ្សែងចេញពីក្នុងហាងមកខាងក្រៅ។ ភ្លាមៗ ក៏មានពលរដ្ឋបានរត់ស្ទុះមកមើលឃើញមានអណ្តាតភ្លើងឆាបឆេះយ៉ាងសន្ធោសន្ធៅបាត់ទៅហើយ ពលរដ្ឋបានប្រញាប់រាយការណ៍ទៅសមត្ថកិច្ចមូលដ្ឋានដើម្បីអន្តរាគមន៍បាញ់ពន្លត់។

ប្រភពព័ត៍មានបឋមជំហានដំបូងគេសង្ស័យកើតចេញពីការផ្សារដែកធ្លាក់កម្ទេចភ្លើងលើសាឡុង ប៉ុន្តែចំពោះមូលហេតុ ច្បាស់លាស់ សមត្ថកិច្ចកំពុងបើកការស្រាវ ។

ករណីអគ្គិភ័យនេះ បានបង្កការខូចខាតអស់សម្ភារៈមួយចំនួនធំ ប៉ុន្តែមិនមានការរាលដាលនោះឡើយ និងបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ចំនួន០៥គ្រឿងបាញ់អោយរលត់ជាស្ថាពរ។

ក្រោយកើតមានករណីអគ្គិភ័យឆាបឆេះនេះ កញ្ញា ពេជ្រ ចរណៃ ដែលគេស្គាល់ថា អ្នកសិល្បការិនីល្បីឈ្មោះមួយរូប បានចេញមុខមកបញ្ជាក់ថា ទីតាំងហាងដែលត្រូវបានអគ្គិភ័យឆេះនោះ គីជាហាងរបស់នាង តែរូបនាងមិនបានរងរបួសអ្វីនោះទេ។ នាងក៏សូមអរគុណដល់អ្នកទាំងអស់គ្នាដែលសួរនាំពីនាង។

កញ្ញា ពេជ្រ ចរណៃ បានសរសេរនៅលើហ្វេសបុកផ្ទាល់ខ្លួនកាលពីយប់មិញថា «សូមអរគុណបងប្អូនទាំងអស់គ្នា ដែលបារម្មណ៍ពីសុវត្ថិភាពរបស់ខ្ញុំ ក្នុងករណីភ្លើងឆេះ ហាងរបស់ខ្ញុំ នៅមុននេះ! ពេលនេះខ្ញុំមិនមានរងរបួសអ្វីទេ តែហាងឆេះទាំងស្រុងហើយ សូមអរគុណគុនបងប្អូនទាំងអស់គ្នាណាស់ »។

សូមបញ្ជាក់ថា ករណីអគ្គិភ័យនេះបានបង្កភ្ញាក់ផ្អើលនៅវេលាម៉ោង០៨និង៤០នាទីយប់ ថ្ងៃទី១៨ ខែមិថុនា ឆ្នាំ២០២៥ នៅចំណុចអាហារដ្ឋាន ពេជ្រ ចរណៃ ល្បុក្កតោ តាមបណ្តោយផ្លូវលេខ ៣១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ៕

អត្ថបទ៖ រដ្ឋា