សមត្ថកិច្ច កំពុងស្រាវជ្រាវអ្នកប្រើប្រាស់រូប AI កាត់រូបភាពកម្សត់ ឆបោក ប្រមូលប្រាក់តាមបណ្តាញសង្គម

នៅព្រឹកថ្ងៃទី៩ ខែកក្កដា ឆ្នាំ២០២៥ នាយកដ្ឋានប្រឆាំងបទល្មើសបច្ចេកវិទ្យា កំពុងស្រាវជ្រាវគណនីហ្វេសប៊ុក ខ្មៃរខ្មែរ ដែលបានបង្កើតរូបភាព AI កាត់រូបក្មេងកំព្រា កម្សត់ និងរូបភាពកងទ័ព ដើម្បីកៀរគរថវិកាលើបណ្តាញសង្គមហ្វេសប៊ុក។​

ប៉ុន្មានថ្ងៃមុន មានហ្វេសប៊ុកឈ្មោះ ខ្មៃរ ខ្មែរ បានកាត់រូបភាព AI ជារូបក្មេងកំព្រា កម្សត់ ត្រូវបានម្តាយស្លាប់ចោល និងការបង្ហោះពីរូបភាពកងទ័ពនៅព្រំដែន ហើយគណនីខាងលើក៏បានដាក់ QR code កុងធនាគារដើម្បីប្រមូលប្រាក់តាមបណ្តាញសង្គម។

ពាក់ព័ន្ធករណីនេះ នៅព្រឹកថ្ងៃទី៩ ខែកក្កដា នាយកដ្ឋានប្រឆាំងបទល្មើសបច្ចេកវិទ្យា បានបង្ហោះលើបណ្តាញសង្គមថា តាមការសង្កេត គណនីហ្វេសប៊ុកឈ្មោះ «ខ្មៃរ ខ្មែរ» បានផ្សព្វផ្សាយព័ត៌មានឆបោក សប្បុរសជន តាមបណ្តាញទំនាក់ទំនងសង្គម ដោយធ្វើការផ្សព្វផ្សាយកៀរគរថវិកាជូនដល់វីរះកងទ័ព ដែលកំពុងឈរជើងនៅតាមព្រំដែនកម្ពុជា-ថៃ, ផ្សព្វផ្សាយពីទុរគតជនខ្វះខាតថវិកា ក្នុងការទិញក្តាមម្ឃូសអោយប្តីដែលបានបាត់បង់ជីវិត, ផ្សព្វផ្សាយឆបោកដោយប្រើប្រាស់បច្ចេកវិទ្យា AI ធ្វើការកាត់តរូបភាពកុមារកំព្រាឪពុកម្តាយ ដើម្បីឆបោកសប្បុរសជន និងភ្ជាប់ជាមួយ រូបភាព QR កូដដើម្បីទទួលប្រាក់ពីសប្បុរជន។

ប្រភពខាងលើ បញ្ជាក់ថា៖ “បច្ចុប្បន្ននាយកដ្ឋានកំពុងធ្វើការកំណត់ និងស្រាវជ្រាវគណនីខាងលើដើម្បីមានចំណាត់ការតាមផ្លូវច្បាប់ ក្នុងករណីរកឃើញបានថាជាករណីផ្សព្វផ្សាយព័ត៌មានឆបោកសប្បុរសជនពិតប្រាកដមែន”។

បន្ថែមពីនេះ នាយកដ្ឋាន ក៏បានអំពាវនាវឱ្យប្រជាពលរដ្ឋគ្រប់រូប មានការប្រុងប្រយ័ត្នខ្ពស់ចំពោះករណីទាំងអស់នេះ និងប្រយ័ត្នចំពោះការប្រមូលកៀរគរថវិកា ដែលគ្មានប្រភពច្បាស់លាស់ ពោល មុននឹងចង់បរិច្ចាគទៅកាន់នរណាម្នាក់ ត្រូវពិនិត្យឱ្យបានច្បាស់លាស់៕