សន្តិសុខសង្គម

ភ្លៀងមួយមេធំ លិចក្រុងបាត់ដំបងស្ទើរទាំងស្រុង

បានផុស

១២ ខែ មុន

នៅ

ថ្ងៃពុធ ៩ កក្កដា ២០២៥

ដោយ

បាត់ដំបង ៖ ចាប់តាំងពីម៉ោង ២រសៀល ថ្ងៃទី០៩ ខែកក្កដា ឆ្នាំ២០២៥ ខេត្តបាត់ដំបងបានទទួលរងនូវសម្ពាធទាប និងបង្កឱ្យមានភ្លៀងធ្លាក់យ៉ាងខ្លាំង ព្រមទាំងបានអូសបន្លាយពេលរាប់ម៉ោង ធ្វើឱ្យប្រព័ន្ធលូមានការកកស្ទះ ស្ទើរគ្រប់ទីកន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងមួយមេធំនេះ គឺបានអូសបន្លាយពេលតាំងពីម៉ោង២រសៀល រហូតដល់ម៉ោង៦ល្ងាច ដែលបង្កឱ្យមានទឹកជន់ លិចស្ទើរគ្រប់ច្រកល្ហកក្នុងក្រុងបាត់ដំបង នេះក៏ដោយសារបញ្ហាប្រព័ន្ធលូ ដែលហូរមិនទាន់ ស្របពេលបច្ចុប្បន្នមានការកាយធ្វើប្រព័ន្ធលូ ដែលសំបូរដោយជង្ហុក ទើបបង្កទៅជាបញ្ហាខូចខាតផ្លូវបន្ថែមទៀត។

ដោយឡែកការធ្វើដំណើររបស់ប្រជាពលរដ្ឋ ក៏កាន់តែជួបផលលំបាក ព្រោះផ្លូវក៏ខូចខាតទៅពេញទាំងក្រុង ហើយត្រូវទឹកលិចបន្ថែមទៀត ដូច្នេះផ្លូវអាចខូចធ្ងន់ធ្ងរក្រោយពេលទឹកស្រក ដែលនេះគឺជាបន្ទុកដ៏ធ្ងន់ធ្ងរដល់ក្រុមការងារនៃធនាគារអភិវឌ្ឍន៍អាស៊ី (ADB) ដែលកំពុងដំណើរការកាយបង្គាប់ប្រព័ន្ធលូទឹកស្អុយ។

បើទោះបីជាថ្មីៗនេះ រដ្ឋបាលខេត្តបាត់ដំបងបានចេញសេចក្តីបំភ្លឺ ដល់សាធារណជននៅក្នុងខេត្តក៏ដូចជាក្រៅខេត្តឱ្យយល់អំពីការខិតខំប្រឹងប្រែង ក្នុងការស្ថាបនាប្រព័ន្ធលូនិងផ្លូវ ដែលមិនទាន់រួចរាល់ជាស្ថាពរ ក៏ដោយ ក៏ការលំបាករបស់ប្រជាពលរដ្ឋក្នុងការធ្វើដំណើរ គឺបានជួបប្រទះរាប់ឆ្នាំមកហើយ ព្រោះបើគេពិនិត្យមើលឃើញថា ផ្លូវក្នុងក្រុងដែលស្អាតពេលទាំងស្រុងហើយនោះ វាបែរជាត្រឡប់ថយក្រោយទៅរកទសវត្សរ៍ទី ៨០ ទៅវិញ ព្រោះដោយសារតែក្រៅពីផ្លូវលេខ ១ គឺខូចខាតស្ទើរទាំងអស់៕

អត្ថបទ ៖ សោ និយមរ័ត្ន