ខេត្តរតនគិរី នឹងមានភ្លៀងធ្លាក់៣ថ្ងៃជាប់គ្នា អាកាសធាតុចុះត្រជាក់ដល់ ២៣°C

តាមការព្យាករស្តីពីស្ថានភាពអាកាសធាតុ បានឱ្យដឹងថា ខេត្តរតនគិរី នឹងមានភ្លៀងធ្លាក់ ព្រមជាមួយផ្គររន្ទះ ៣ ថ្ងៃ​ជាប់គ្នា ចាប់ពីថ្ងទី​២៨-៣0 ខែតុលា ឆ្នាំ ២០២៥ ជាមួយនឹងសីតុណ្ហភាពធ្លាក់ចុះដល់ ២៣ អស្សាសេ ខណៈអាជ្ញាធរអំពាវនាវពលរដ្ឋបង្កើនការប្រុងប្រយ័ត្ន។ ករណីភ្លៀងធ្លាក់នេះ ដោយសារជ្រលងសម្ពាធទាប បាននឹងកំពុងមានឥទ្ធិពលមកខេត្តរតនគិរី ស្ថិតនៅភូមិភាគឦសាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថានភាពបែបនេះនឹងធ្វើឱ្យសីតុណ្ហភាព ពី ២៣°C ទៅ ៣០ °C ខ្យល់បក់ប្រែប្រួលទិស និង មានល្បឿនលឿងខ្លាំង ពី ១ ទៅ ៤ ម៉ែត្រ/វិនាទី។ លើសពីនេះ នឹងមានភ្លៀងផ្គររន្ទះពី តិចទៅច្រើនខ្លាំង ភវនីយភាណ ៨០ ភាគរយ។ ស្ថានភាពជាក់ស្តែង នៅថ្ងៃនេះមិនមានពន្លឺព្រះអាទិត្យនោះទេ ហើយពពកខ្មៅក្រាស់នៅពេលព្រឹក។ ជាការកត់សម្គាល់ ភ្លៀងធ្លាក់ និងរលឹមស្រិចៗតាំងពីព្រឹករហូតដល់ពេលយប់ និងមានខ្យល់បក់តិចតួច។

អាកាសធាតុនេះ មន្ទីរធនធានទឹកខេត្តរនតគិរី អំពាវនាវទៅដល់ប្រជាពលរដ្ឋដែលរស់នៅជាប់ទឹកទន្លេសេសាន និងទន្លេស្រែពក ស្ទឹង បឹង អូរ ត្រូវមានការប្រុងប្រយ័ត្នខ្ពស់ ដោយទឹកនឹងកើនឡើងយ៉ាងឆាប់រហ័ស ជាពិសេស ថែរក្សាសុខភាពនិងត្រៀមអាវភ្លៀងរាល់ពេលចេញដំណើរ។

យោងព្រឹត្តិបត្រព្យាករកម្រិតទឹកភ្លៀង នៃក្រសួងធនធានទឹក និងឧត្តុនិយម បានឱ្យដឹងថា កម្ពុជានឹងមានភ្លៀងធ្លាប់ពីតិចទៅច្រើននៅតាមបណ្ដារាជធានី-ខេត្ត នីមួយៗ គិតចាប់ពីថ្ងៃទី២៧ ខែតុលា រហូតដល់ថ្ងៃទី០២ ខែវិច្ឆិកា ឆ្នាំ២០២៥៕

ដោយ៖ ខៀវ ចាប