ជំនន់ទឹកភ្លៀងបន្តកើនឡើងលិចឃុំចំនួន៤ក្នុងស្រុកកោះញែក

បើតាមការឲ្យដឹងពីលោក ឡោ សុខា ស្នងការនគរបាលខេត្តមណ្ឌលគិរី បានប្រាប់ កម្ពុជាថ្មី ថា ដោយអាកាសធាតុភ្លៀងធ្លាក់ជាប់ៗគ្នា ចាប់ពីម៉ោង២ទាបភ្លឺថ្ងៃទី២៣ ខែកញ្ញាមក ទឹកបានជោរជន់ឡើងក្លាយជាជំនន់ទឹកភ្លៀងលិចលំនៅឋានពលរដ្ឋជាច្រើនខ្នង ក្នុងនោះមានឃុំចំនួន៤រួមមាន ឃុំណងឃីឡឹក ឃុំស្រែហ៊ុយ ឃុំស្រែសង្គម និងឃុំរយ៉នៃស្រុកកោះញែក បានរងគ្រោះជន់លិចដោយជំនន់ទឹកភ្លៀង។

លោកស្នងការបញ្ជាក់ថា ក្នុងប្រតិបត្តិការជួយអន្តរាគមន៍៍ ស្នងការដ្ឋាននគបានខេត្តបានបញ្ចេញកម្លាំងចំនួន៥០នាក់ រួមទាំងកម្លាំងអធិការស្រុកកោះញែកបន្ថែមទៀត ជាមួយ ទូក រថយន្តកែឆ្នៃ ត្រាក់ទ័រ ជាដើម ដើម្បីជម្លៀសពលរដ្ឋទៅទីទួលមានសុវត្ថុភាព។

បើតាមលោកស្នងការ គិតត្រឹមរសៀលថ្ងៃទី២៣ កញ្ញា ឆ្នាំ២០២៥នេះ ស្ថានភាពទឹកជំនន់មិនទាន់ស្រកថមថយនៅឡើយទេ ពោលគឺមានតែកើនឡើងជាបន្តបន្ទាប់ទៀត នេះបើតាមការពិនិត្យជាក់ស្តែងអំពីកម្រិតទឹកបច្ចុប្បន្ន

យ៉ាងណាមិញ នៅក្នុងហេតុការណ៍ជំនន់ទឹកភ្លៀងលិចលំនៅឋានពលរដ្ឋនោះ អាជ្ញាធរបានអះអាងថា មិនបណ្ដាលឲ្យប្រជាពលរដ្ឋណាម្នាក់រងគ្រោះប៉ះពាល់ដល់អាយុជីវិតនោះទេ គ្រាន់តែប៉ះពាល់ខូចខាតទ្រព្យសម្បត្តិពលរដ្ឋចំនួនតែប៉ុណ្ណោះ។

លោក ឡោ សុខា ក៏បានអំពាវនាវដល់ប្រជាពលរដ្ឋរស់នៅតាមមូលដ្ឋានដែលរងនូវការជន់លិចដោយជំនន់ទឹកភ្លៀងដោយគ្រោះធម្មជាតិ សូមមេត្តាផ្តល់ព័ត៌មានទៅដល់អាជ្ញាធរមូលដ្ឋានមានសមត្ថកិច្ច ដូចជាប៉ុស្តិ៍រដ្ឋបាលអធិការចំណុះឲ្យស្នងការខេត្ត និងមន្រ្តីជំនាញពាក់ព័ន្ធទៀត ដើម្បីបញ្ជូនកម្លាំងទៅដល់មូលដ្ឋានប្រជាពលរដ្ឋដើម្បីសង្គ្រោះជម្លៀស
ទៅទីទួលមានសុវត្ថិភាពឲ្យទាន់ពេលវេលាផងដែរ៕

អត្ថបទ៖ រៀម សុខហេង