កីឡា

ខ្សែប្រយុទ្ធ Cristian Roque កំពុងឡើងជើងវិញ ចំពេលពាន AFC Challenge League មកដល់

បានផុស

៩ ខែ មុន

នៅ

ថ្ងៃអង្គារ ២១ តុលា ២០២៥

ដោយ

ខ្សែបម្រើប្រយុទ្ធកណ្តាល Cristian Roque បានបង្ហាញសមត្ថភាពលេចធ្លោគួរឲ្យចាប់អារម្មណ៍ក្នុងការប្រកួតដែល ព្រះខ័នរាជស្វាយរៀង បានយកឈ្នះ កងយោធពលខេមរភូមិន្ទ ដោយលទ្ធផល ៦-១ ក្នុងសប្តាហ៍ទី៨ នៃលីគបាល់ទាត់កំពូលកម្ពុជា កាលពីថ្ងៃអាទិត្យ ទី១៩ ខែតុលា ឆ្នាំ ២០២៥ នៅស្តាតចាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Cristian បានរបួសកាលពីចុងរដូវកាលមុនរហូតត្រូវបានយកទៅពិនិត្យព្យាបាលនៅក្រៅប្រទេសមុនការប្រកួតវគ្គផ្តាច់ព្រ័ត្រ AFC Challenge League ជាមួយក្រុម Arkadag។ របួសនោះនៅតែមិនទាន់ជាសះស្បើយ សូម្បីតែការចេញទៅប្រកួតហ្វឹកហាត់នៅប្រទេសម៉ាឡេស៊ី កាលដើមរដូវកាលថ្មីនេះ ក៏រូបគេមិនបានបង្ហាញខ្លួនលើទីលានដែរ។

រដូវកាលថ្មីចូលមកដល់ គ្រូបង្វឹកបានដាក់ឲ្យកីឡាករសញ្ជាតិប្រេស៊ីលចូលលេងនៅវគ្គទី២ មុនពេលមានឈ្មោះលេងជម្រើស១១នាក់ដំបូង។ សម្រាប់ការប្រកួតលីគបាល់ទាត់កំពូលកម្ពុជា ៥ ប្រកួតដំបូង រូបគេមិនអាចរកបានគ្រាប់បាល់ ឬបញ្ជូនបាល់ឲ្យមិត្តរួមក្រុមណាមួយសោះ។ ឈានចូលការប្រកួតទី៦ ទើបរូបគេ ស៊ុតបាន ១ គ្រាប់ និងបញ្ជូនបាល់ឲ្យ Kwame Peprah ស៊ុតចូល ១ គ្រាប់ ប៉ុន្តែជាពេលដែល ព្រះខ័នរាជស្វាយរៀង បានចាញ់ ភ្នំពេញក្រោន ដោយលទ្ធផល ២-៣។

ឈានចូលសប្តាហ៍ទី៨ ដែលជាការប្រកួតទី៧ របស់ ព្រះខ័នរាជស្វាយរៀង Cristian Roque បានបង្ហាញសមត្ថភាពកាន់តែល្អដោយរកបាន ២ គ្រាប់ និងក្លាយជាកីឡាករល្អប្រចាំការប្រកួតក្នុងជ័យជម្នះ ៦-១ លើម្ចាស់ កងយោធពលខេមរភូមិន្ទ។

ចំណែកការប្រកួតក្នុងពាន ASEAN Club Championship វិញ រូបគេបានស្ថិតនៅកៅអីបម្រុង ជាពេល ព្រះខ័នរាជស្វាយរៀង បានឈ្នះក្រុម Shan United ដោយលទ្ធផល ៣-០ នៅទឹកដីមីយ៉ាន់ម៉ា និងការប្រកួតទី២ នៅទឹកដីវៀតណាម Cristian ជាប់ជម្រើស ១១នាក់ដំបូង។

ពេលនេះ កីឡាករប្រេស៊ីលដែលប្រកបអាជីពបាល់ទាត់នៅកម្ពុជាឈានដល់ឆ្នាំទី ៥ កំពុងឡើងវិញ ទាំងកម្លាំងស្មារតី និងកាយសម្បទា សម្រាប់ការប្រកួតពានរង្វាន់អន្តរជាតិ ដើម្បីចាប់ដៃគ្នាជាមួយខ្សែប្រយុទ្ធបរទេសជួរមុខកំពុងល្អ Patrick និង Kwame ។ ដូច្នេះពួកគេទាំង ៣ នឹងក្លាយជាកម្លាំងជួរមុខដ៏សំខាន់សម្រាប់ការប្រកួតសន្សំពិន្ទុក្នុងពូល D នៃពានរង្វាន់ AFC Challenge League។

កីឡាករ មិន រតនៈ, គឹម សុខយុទ្ធ និង Cristian អបអរ

សូមបញ្ជាក់ថា ព្រះខ័នរាជស្វាយរៀង ប្រកួតជាមួយក្រុមម៉ុងហ្គោលី SP Falcons នៅថ្ងៃអាទិត្យ ទី២៦ ខែតុលា វេលាម៉ោង ៤រសៀល ហើយការប្រកួតទី ២ ជាមួយក្រុមឡាវ Ezra FC ម៉ោង៧យប់ថ្ងៃទី២៩ ខែតុលា និងចុងក្រោយជាមួយហ្វីលីពីន Manila Digger ម៉ោង៧យប់នៅថ្ងៃទី១ ខែវិច្ឆិកា៕