មុនជួបគ្នាស្អែក Kwame ប្រាប់ថា មិនបារម្ភពីកីឡាករថ្មីរបស់ ភ្នំពេញក្រោន

ខ្សែប្រយុទ្ធរបស់ក្រុម ព្រះខ័នរាជស្វាយរៀង កីឡាករ Kwame Peprah បានសារភាពត្រង់ៗ ដោយមិនមានក្តីព្រួយបារម្ភ​ពី​កីឡាករថ្មីទាំង ៣ នាក់របស់ក្រុម ភ្នំពេញក្រោន សម្រាប់ជំនួបជើងទី ១ វគ្គ ៨ ក្រុមចុងក្រោយពានរង្វាន់ AFC Challenge League នៅថ្ងៃ ព្រហស្បតិ៍ ទី ៥ ស្អែកនេះឡើយ ទោះមិនទាន់បានលេងទល់មុខគ្នាសូម្បីម្តងក៏ដោយ។

ក្នុងសន្នសីទសារព័ត៌មាននាព្រឹកថ្ងៃ ពុធ ទី ៣ ខែ មីនា ឆ្នាំ ២០២៦ នេះ កីឡាករ Kwame ត្រូវបានអ្នកសារព័ត៌មានសួរអំពីចំណាប់អារម្មណ៍ចំពោះកីឡាករថ្មីរបស់ ភ្នំពេញក្រោន។ ភ្លាមនោះកីឡាករបានឆ្លើយទៅវិញ ថា៖ «ខ្ញុំមិនមានការបារម្ភអ្វីទេ ចំពោះកីឡាករថ្មីរបស់ ភ្នំពេញក្រោន ព្រោះពួកយើងសុទ្ធតែជាកីឡាករបាល់ទាត់ដូចគ្នា។ អ្វីដែលពួកយើងដឹងពីកីឡាករថ្មី ភ្នំពេញក្រោន គឺទទួលបានតាមរយៈការវិភាគវីដេអូមួយចំនួន។ យើងបានរៀបចំយ៉ាងពេញលេញសម្រាប់ការប្រកួតមួយនេះ»។

ការលើកឡើងរបស់ Kwame គឺមិនមានការព្រួយបារម្ភជាមួយកីឡាករបរទេស ភ្នំពេញក្រោន ទេ។ ជាពិសេសកីឡាករចំណូលថ្មី ៣ នាក់រួមមាន​ខ្សែការពារសញ្ជាតិ អ៉ីតាលី Pape Lo, ខ្សែបម្រើសញ្ជាតិ កាណាដា Deigo Gutierrez និង ខ្សែប្រយុទ្ធសញ្ជាតិ អ៊ុយក្រែន Valeriy Gryshyn។ ខ្សែប្រយុទ្ធសញ្ជាតិ ហ្គាណា វ័យ ២៥ ឆ្នាំ បានលើកពីហេតុផល ដែលធ្វើឱ្យគេមិនមានការព្រួយបារម្ភ ព្រោះនៅទីលានសុទ្ធតែជាកីឡាករដូចគ្នា។ ជាមួយគ្នានេះ រូបគេ រួមជាមួយក្រុមទាំងមូល គឺបានត្រៀមខ្លួនរួចរាល់ហើយ។

គួរបញ្ជាក់ផងដែរ ថា ការប្រកួតវគ្គ ៨ ក្រុមចុងក្រោយពាន ACGL គឺ ភ្នំពេញក្រោន ហាក់មានតែមលើស ព្រះខ័នរាជស្វាយរៀង បន្តិច ត្រង់ថា ពួកគេមានកីឡាករបរទេសសរុបចំនួន ១១ នាក់។ ចំណែក ព្រះខ័នរាជស្វាយរៀង វិញ មានតែ ៨ នាក់ប៉ុណ្ណោះ ដោយមានចំនួនតិចជាង ៣ នាក់៕

អត្ថបទ៖ សេម កុសល