កីឡា

Odawara ឡើងឈរលេខ ៤ សម្រាប់ Top Scorer ពាន AFC Challenge League

បានផុស

៤ ខែ មុន

នៅ

ថ្ងៃសុក្រ ១៣ មីនា ២០២៦

ដោយ

ខ្សែការពាររបស់ ព្រះខ័នរាជស្វាយរៀង Takashi Odawara ស្ថិតនៅចំណាត់ថ្នាក់លេខ ៤ ក្នុងនាមជាកីឡាកររកបានគ្រាប់បាល់ច្រើនជាងគេបំផុតក្នុងពានរង្វាន់ AFC Challenge League រដូវកាល ២០២៥-២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេល ព្រះខ័នរាជស្វាយរៀង ទទួលបានជ័យជម្នះ ២-១ លើ ភ្នំពេញក្រោន ក្នុងជើងទី២ វគ្គ ៨ ក្រុមចុងក្រោយ ពានរង្វាន់ AFC Challenge League ខ្សែការពារសញ្ជាតិជប៉ុន Takashi Odawara រកបាន ២ គ្រាប់។

២ គ្រាប់ខាងលើនេះបន្ថែមលើ ២ គ្រាប់រកបានក្នុងសន្សំពិន្ទុក្នុងពូលគឺ Odawara រកបាន ១ គ្រាប់នៅពេល ព្រះខ័នរាជស្វាយរៀង ឈ្នះ SP Falcons ៣-០ និង ១ គ្រាប់ទៀតនៅពេល ព្រះខ័នរាជស្វាយរៀង ឈ្នះ Ezra FC ៣-០ ដូច្នេះ Odwara រកបាន ៤ គ្រាប់ បានឡើងទៅឈរលេខ ៤ ក្នុងចំណោមកីឡាកររកបានគ្រាប់បាល់ច្រើនជាងគេ។

ចំណែកកីឡាករ ៣ នាក់ទៀតដែលមានគ្រាប់បាល់ច្រើនជាង Odawara គឺសុទ្ធតែជាខ្សែប្រយុទ្ធ។ កីឡាករ Mose Dyer របស់ភ្នំពេញក្រោន រកបាន ៧ គ្រាប់ ស្ថិតនៅលេខ ១ ប៉ុន្តែពេលនេះ ភ្នំពេញក្រោន បានធ្លាក់ហើយ។

ចំណាត់ថ្នាក់លេខ២ បានទៅខ្សែប្រយុទ្ធ Kwame Peprah របស់ ព្រះខ័នរាជស្វាយរៀង រកបាន ៦ គ្រាប់ ហើយកំពុងក្លាយជាកីឡាករប្រជែងពានស្បែកជើងមាស ដោយសារក្លិបបានបន្តឡើងទៅកាន់វគ្គពាក់កណ្តាលផ្តាច់ព្រ័ត្រ។ ជាមួយគ្នានេះ ខ្សែប្រយុទ្ធ Ousam Gai របស់ក្លិបហ្វីលីពីន Manila Digger រកបាន ៥ គ្រាប់ក៏ជាគូប្រជែងស្បែកជើងមាសដែរដោយក្រុមនេះត្រូវជួប ព្រះខ័នរាជស្វាយរៀង នៅវគ្គពាក់កណ្តាលផ្តាច់ព្រ័ត្រ។