កីឡា

មុនប៉ះគ្នា Manila Digger មានពេលត្រៀមខ្លួនជាង ១០ ថ្ងៃ ខណៈ ព្រះខ័នរាជស្វាយរៀង មានតែ ៤ ថ្ងៃ

បានផុស

៣ ខែ មុន

នៅ

ថ្ងៃពុធ ១ មេសា ២០២៦

ដោយ

គិតចាប់ពីថ្ងៃទី២៩ ខែមីនា មក ក្រុមខ្លាំងរបស់ហ្វីលីពីន Manila Digger មិនមានការប្រកួតឡើយដោយត្រៀមខ្លួនទាំងស្រុងសម្រាប់ការប្រកួតជាមួយ ព្រះខ័នរាជស្វាយរៀង នៅថ្ងៃទី ៩ ខែមេសា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម Manila Digger ទទួលបានជ័យជម្នះយ៉ាងធំធេងលើក្រុម Philippine Army ដោយលទ្ធផល ១០-០ សម្រាប់ការប្រកួតក្នុងលីគ កាលពីថ្ងៃទី២៩ ខែមីនា ឆ្នាំ ២០២៦។ ពួកគេត្រូវប្រកួតជាមួយក្រុម Taguig នៅថ្ងៃទី ៨ ខែមេសា ក្នុងលីគបន្តទៀត ប៉ុន្តែការប្រកួតនេះត្រូវបានលើកពេល ដោយសារត្រូវធ្វើដំណើរមកប្រទេសកម្ពុជា។

ប្រការនេះមានន័យថា ក្រុម Manila Digger បានសម្រាករហូតដល់ជាង ១០ ថ្ងៃដើម្បីត្រៀមខ្លួនសម្រាប់ការប្រកួតជាមួយ ព្រះខ័នរាជស្វាយរៀង នៅថ្ងៃទី៩ ខែមេសា ឆ្នាំ ២០២៦ ក្នុងជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League នៅពហុកីឡដ្ឋានជាតិមរតកតេជោ។

ក្រោយប្រកួតជាមួយ ព្រះខ័នរាជស្វាយរៀង នៅកម្ពុជា ក្រុម Manila Digger ត្រូវប្រកួតជាមួយក្រុម Laguna Stallions នាថ្ងៃទី១១ មេសា ក្នុងលីគ ប៉ុន្តែនៅមិនទាន់ច្បាស់ថា ការប្រកួតនេះលើកពេល ឬយ៉ាងណានោះទេ មុនពេលពួកគេត្រូវទទួល ព្រះខ័នរាជស្វាយរៀង នៅថ្ងៃទី១៦ ខែមេសា នៅហ្វីលីពីន សម្រាប់ជើងទី២ វគ្គពាក់កណ្តាលផ្តាច់ព្រ័ត្រ AFC Challenge League។

ទោះបីជាយ៉ាងណា ការប្រកួតនេះទំនងជាអាចត្រូវបានលើកពេល ពីព្រោះកាលប្រួតវគ្គ ៨ ក្រុមចុងក្រោយ និងវគ្គសន្សំពិន្ទុក្នុងពូល ពានអាស៊ីកម្រិតទី៣ កន្លងមក លីគបាល់ទាត់ហ្វីលីពីនបានលើកពេលឲ្យពួកគេត្រៀមខ្លួនយ៉ាងល្អ។

ចំណែក ព្រះខ័នរាជស្វាយរៀង មានពេលត្រៀមខ្លួនត្រឹមតែ ៤ ថ្ងៃប៉ុណ្ណោះសម្រាប់ការប្រកួតជើងទី ១ ពីព្រោះត្រូវប្រកួតជាមួយ ភ្នំពេញក្រោន នៅលីគកំពូលកម្ពុជា នាថ្ងៃសៅរ៍ ទី៤ ខែមេសា ឆ្នាំ ២០២៦ នៅកីឡដ្ឋានភ្នំពេញក្រោន មុនពេលប៉ះ Manila Digger នៅថ្ងៃទី៩ ខែមេសា។

បើយោងតាមកាលវិភាគដែលក្លិបព្រះខ័នរាជស្វាយរៀងបានបង្ហាញថា ក្លិបនឹងត្រូវប្រកួតជាមួយ ក្រុមអឹមអូអាយ កំពង់ដេវ៉ា នៅថ្ងៃអាទិត្យ ទី១២ ខែមេសា មុនពេលធ្វើដំណើរទៅប្រទេសហ្វីលីពីន ដូច្នេះពួកគេមានពេលត្រឹមតែ ៤ ថ្ងៃប៉ុណ្ណោះសម្រាប់ការធ្វើដំណើរ និងត្រៀមខ្លួនប្រកួតជាមួយ Manila Digger សម្រាប់ជើងទី២ នៅថ្ងៃទី១៦ ខែមេសា។

សូមបញ្ជាក់ថា ពីរប្រកួតចុងក្រោយរបស់ Manila Digger បានលត់ដៃយ៉ាងចាស់តែម្តងគឺឈ្នះ Tuloy FC ១៤-០ និង ឈ្នះ Philippine Army ១០-០ ខណៈពីរប្រកួតចុងក្រោយរបស់ ព្រះខ័នរាជស្វាយរៀង ឈ្នះ អង្គរថាយហ្គឺរ ២-០ និងស្មើ បឹងកេត ០-០៕

កម្មវិធីប្រកួតរបស់ Manila Digger