ក្រុម​ជម្រើសជាតិ ៥ មាន​កីឡាករ​តម្លៃ​ថ្លៃបំផុតនៅ World Cup 2026 ខណៈ បារាំង លេខ ២

ក្រុមសម្បូរកីឡាករល្បីៗមាន់គក បារាំង បានស្ថិតនៅចំណាត់ថ្នាក់លេខ ២ ខណៈក្រុមតោកំណាច អង់គ្លេស កំពុងកាន់កាប់តំណែងលេខ ១ ជាក្រុមជម្រើសជាតិ ​ដែល​កីឡាករ​មានតម្លៃថ្លៃបំផុត​សម្រាប់​ការ​ចូល​រួម​ប្រកួត​ជើង​ឯកពិភពលោក World Cup 2026។

ក្នុងព្រឹត្តិការណ៍ World Cup 2026 បានរកឃើញក្រុមទាំង ៤៨ ជាផ្លូវការ មកពី ៦ ទ្វីបផ្សេងគ្នា ដើម្បីឡើងទៅជុំចុងក្រោយ ដែលធ្វើឡើង​សហម្ចាស់ផ្ទះនៅ សហរដ្ឋអាមេរិក កាណាដា និង ម៉ិកស៉ិក។ ទោះ​បី​ជា​យ៉ាងណា ការបែងចែកពូលក៏បានធ្វើឡើងហើយដែរ ដោយមានសរុប ១២ ពូល ខណៈ ១ ពូលមាន ៤ ក្រុម។

បើក្រឡេកមើលក្រុមជម្រើសជាតិកំពូល ៥ ក្នុងចំណោមក្រុមទាំង ៤៨ ដែលបានឡើងទៅជុំចុងក្រោយ World Cup 2026 ក្នុងនោះ អង់គ្លេស ឈរជាក្រុមមានក្រុមកីឡាករសរុប មានតម្លៃថ្លៃបំផុតក្នុងលោក គឺចំនួន ១.៨៦ ប៊ីលានដុល្លារអាមេរិក។ បារាំង ឈរលេខ ២ មានតម្លៃ ១.៥៧ ប៊ីលានដុល្លារអាមេរិក, អេស្ប៉ាញ ឈរលេខ ៣ មានតម្លៃ ១.៥០ ប៊ីលានដុល្លារអាមេរិក។

ចំណែកក្រុមជម្រើសជាតិ ព័រទុយហ្គាល់ ឈរនៅចំណាត់ថ្នាក់លេខ ៤ មានតម្លៃកីឡាករសរុបចំនួន ៩៩៦ លានដុល្លារអាមេរិក។ ចុងក្រោយក្រុមជម្រើសជាតិ ប្រេស៊ីល ស្ថិតនៅលេខ ៥ មានតម្លៃកីឡាករសរុបចំនួន ៨៩៧ លានដុល្លារអាមេរិក។ មែនទែនទៅ ទិន្នន័យសរុប គឺ អ៉ីតាលី ត្រូវស្ថិតនៅលេខ ៥ ដោយមានតម្លៃខ្លួនកីឡាករ ៩៦០ លានដុល្លារអាមេរិក ប៉ុន្តែដោយពួកគេមិនបានជាប់ទៅ World Cup 2026 ជុំចុងក្រោយ ដូច្នេះមិនរាប់ចូលនោះទេ។

តម្លៃខ្លួនសរុបនៃកីឡាករតាមជម្រើសជាតិនីមួយៗ អាចនឹងមានការប្រែប្រួលខ្លះ នៅពេលក្រុមជម្រើសជាតិនីមួយៗ ប្រកាសបញ្ជីឈ្មោះកីឡាករថ្មីចុងក្រោយសម្រាប់ចូលលេងនៅ World Cup 2026។ ទោះបីជាយ៉ាងណា អ្វីៗអាចនឹងមិនប្រែប្រួលច្រើននោះទេ ដោយសារសមាសភាពកីឡាករក្នុងក្រុមជម្រើសជាតិនៅពេលនេះ សុទ្ធតែត្រៀមដើម្បី World Cup 2026 ខាងមុខនេះ។

គួរបញ្ជាក់ ថា ព្រឹត្តិការណ៍ World Cup 2026 គឺនៅសល់ ២ ខែជាងទៀតប៉ុណ្ណោះ ដោយការប្រកួតនឹងចាប់ផ្តើមពីថ្ងៃទី ១១ ខែ មិថុនា ដល់ថ្ងៃទី ១៩ ខែ កក្កដា ឆ្នាំ ២០២៦៕ប្រែសម្រួល៖ សេម កុសល
ប្រភព៖ Transfer Market