កីឡា

៥ ចំណុច ត្រូវដឹងមុនទៅទស្សនា ព្រះខ័នរាជស្វាយរៀង ប៉ះ Manila Digger

បានផុស

៣ ខែ មុន

នៅ

ថ្ងៃពុធ ៨ មេសា ២០២៦

ដោយ

ការទស្សនាការប្រកួតបាល់ទាត់នៅលើទីលានជាគោលដៅសំខាន់សម្រាប់អ្នកគាំទ្រគ្រប់រូបដើម្បីលើកទឹកចិត្តដល់កីឡាករ និងក្រុមរបស់ខ្លួន ប៉ុន្តែក្រៅពីបាល់ទាត់ ក៏មានអ្វីពិសេសផ្សេងទៀតដែលអ្នកគាំទ្រគួរដឹងដែរ។

ការប្រកួតអន្តរជាតិចុងក្រោយនៅកម្ពុជារដូវកាលនេះ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតរវាង ព្រះខ័នរាជស្វាយរៀង និង Manila Digger ធ្វើនៅវេលាម៉ោង ៧ យប់ថ្ងៃព្រហស្បតិ៍ ទី៩ ខែមេសា ឆ្នាំ ២០២៦ នៅពហុកីឡដ្ឋានជាតិមរតកតេជោ ជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League។ នេះជាការប្រកួតអន្តរជាតិចុងក្រោយសម្រាប់ក្លិបនៅលើទឹកដីកម្ពុជា ពីព្រោះជើងទី២ ថ្ងៃទី១៦ ខែមេសា នៅប្រទេសហ្វីលីពីន ហើយប្រសិនបើ ព្រះខ័នរាជស្វាយរៀង ឡើងវគ្គផ្តាច់ព្រ័ត្រ គឺធ្វើនៅប្រទេសក្នុងតំបន់អាស៊ីខាងលិច។

តម្លៃសំបុត្រ

សំបុត្រសម្រាប់ចូលទស្សនាការប្រកួតអន្តរជាតិដ៏សំខាន់នៅលើដីកម្ពុជានេះ គឺមានតែមួយប្រភេទគត់ តម្លៃ ៨០០០រៀល។ សំបុត្រអាចរកទិញបានតែនៅលើ App របស់ក្លិបព្រះខ័នរាជស្វាយរៀង តែម្យ៉ាង គឺគ្មានសំបុត្រជាសន្លឹកក្រដាសឡើយ។ ការធ្វើបែបនេះងាយស្រួលសម្រាប់អ្នកគាំទ្រទិញ មិនចំណាយពេលវេលាយូរ មិនបារម្ភបាត់បង់ ខូចរហែក និងមិនធ្វើឲ្យប៉ះពាល់បរិស្ថាន។

តារាចម្រៀងច្រៀងជូនកម្សាន្ត

មុនការប្រកួតចាប់ផ្តើម ចន្លោះម៉ោងសម្រាកវគ្គទី១ និងក្រោយការប្រកួត អ្នកគាំទ្រនឹងបានទស្សនាកម្សាន្តតាមរយៈការបកស្រាយបទចម្រៀងរបស់លោក រៀម សុខភារម្យ, ម៉ម ពេជ្ជរិទ្ធ, តារាចម្រៀងស្រី រ៉ាប៊ី និងឌីជេ DJz Zanako។ ប្រការនេះបានផ្តល់ឲ្យអ្នកគាំទ្រទទួលបានភាពសប្បាយរីករាយលើសពីទស្សនាបាល់ទាត់។

កម្មវិធីកម្សាន្ត

មិនត្រឹមតែប៉ុណ្ណោះ អាចនឹងមានកម្មវិធីកម្សាន្តផ្សេងៗទៀតនៅខាងមុខពហុកីឡដ្ឋានជាតិមរតកតេជោ។ តាមការប្រកាសរបស់ក្លិបគឺថា មុនការប្រកួត នឹងមានសង្ក្រាន្តព្រះខ័នរាជស្វាយរៀង ទីតាំងលក់ផលិតផល ការលេងល្បែងប្រជាប្រិយ និងការរាំលេងកម្សាន្តជាដើម។ តើអ្នកគាំទ្រចង់ឲ្យមានទេ?

ធ្វើដំណើរដោយ TADA បញ្ចុះតម្លៃ

ចំណុចសំខាន់មួយទៀត ដើម្បីងាយស្រួលដល់អ្នកទស្សនាក្នុងការធ្វើដំណើរដោយមិនចង់ប្រាស់មធ្យោបាយផ្ទាល់ខ្លួន បងប្អូនអាចធ្វើដំណើរតាម TADA ដោយប្រើកូដ PKRSVR នឹងទទួលបានការបញ្ចុះតម្លៃ ៤០០០រៀល x ២ដង ទាំងទៅ និងមក។ សុពលភាពសម្រាប់ថ្ងែទី ៩ ខែមេសា ប៉ុណ្ណោះ។

កុំភ្លេចណា! ចូលរួមគាំទ្រ និងលើកទឹកចិត្តទាំងអស់គ្នាដល់ក្រុមកីឡាករ និងថ្នាក់ដឹកនាំក្លិបដើម្បីមុខមាត់បាល់ទាត់កម្ពុជាលើឆាកអន្តរជាតិ៕