គ្រូ Manila Digger ថា ផែនការធំបំផុតល្ងាច​នេះ គឺឈ្នះព្រះខ័នរាជស្វាយរៀង

គ្រូបង្វឹករបស់ក្រុម Manila Digger លោក Kim Versales បានបង្ហើបពីផែនការធំបំផុតរបស់លោក សម្រាប់ការប្រកួតថ្ងៃនេះ​គឺមក កម្ពុជា លើកនេះ ដើម្បីយកឈ្នះ ព្រះខ័នរាជស្វាយរៀង ទៅ​ស្រុក​វិញ។

លោក Kim Versales ថា ក្រុមលោកបានត្រៀមខ្លួន និងរៀបចំក្រុមរួចរាល់ហើយ មុនការប្រកួតជើងទី ១ វគ្គពាក់កណ្តាលផ្តាច់ព្រ័ត្រពាន AFC Challenge League ទល់នឹង ព្រះខ័នរាជស្វាយរៀង។ ទោះ​បី​ជាយ៉ាងណា លោកមានការរំពឹងខ្ពស់សម្រាប់ការប្រកួតនេះ ថា ក្រុមរបស់លោកនឹងអាចទទួលបានជ័យជម្នះលើ ព្រះខ័នរាជស្វាយរៀង នៅទឹកដី កម្ពុជា។

ថ្លែងនៅក្នុងសន្និសីទសារព័ត៌មាន លោក Kim Versales បានមានប្រសាសន៍ ថា៖ «ពួកយើងបានត្រៀមក្រុមយ៉ាងល្អ ហើយរំពឹងថានឹងមានការប្រកួតដ៏ល្អមួយនៅថ្ងៃស្អែកពី Manila Digger។ […] សម្រាប់ពួកយើង យើងមិនអាចបង្ហាញផែនការរបស់យើងសម្រាប់ការប្រកួតនេះបានទេ។ យើងគ្រាន់តែចង់ឲ្យអ្នករំពឹងថា នឹងមានការប្រកួតដ៏ល្អមួយពីក្រុមយើងនៅថ្ងៃស្អែក…»។

គ្រូបង្វឹក Manila Digger បានបន្ថែម ថា៖ « ផែនការរបស់យើងគឺត្រូវយកជ័យជម្នះនៅទីនេះនៅថ្ងៃស្អែក។ នោះគឺជាគោលដៅធំរបស់យើង យើងត្រូវការសមិទ្ធផលដ៏ធំមួយនៅថ្ងៃស្អែក នៅទីនេះលើទឹកដីរបស់អ្នក។ នោះគឺជាផែនការរបស់យើង។ ប៉ុន្តែសម្រាប់ផែនការលម្អិត វាគឺជាផែនការផ្ទាល់ខ្លួនរបស់យើងរួចហើយ»។

គួរបញ្ជាក់ ថា ក្រុម Manila Digger និង ព្រះខ័នរាជស្វាយរៀង បានជួបគ្នារួចម្តងហើយ កាលពីវគ្គចែកពូលនៃពូល D ពាន AFC Chellenge League ដោយពេលនោះលទ្ធផលស្មើគ្នា ២-២។ ក្រុមទាំង ២ នឹងត្រូវជួបគ្នាជាថ្មី នៅ ពហុកីឡដ្ឋានជាតិមរតកតេជោ ថ្ងៃ ព្រហស្បតិ៍ ទី ៩ ខែ មេសា ស្អែកនេះ ដែលជាការប្រកួតជើងទី ១ វគ្គពាក់កណ្តាលផ្តាច់ព្រ័ត្រពាន ACGL។

ការប្រកួតនេះ ត្រូវបានគេរំពឹង ថា នឹងកាន់តែជក់ចិត្ត និងប្រែប្រួលច្រើន ដោយសារក្រុមទាំង ២ សុទ្ធតែបានបន្ថែមសមាសភាពកីឡាករថ្មីមួយចំនួនដូចគ្នា៕

អត្ថបទ៖ សេម កុសល