កីឡា

ONE ជាប់លេខ ១ ពីចំនួនអ្នកមើលវីដេអូលើ Facebook ក្នុងចំណោមស្ថាប័នកីឡាជាង ៥ ពាន់

បានផុស

៤ years មុន

នៅ

ថ្ងៃចន្ទ ១៧ មករា ២០២២

ដោយ

ស្ថាប័នប្រដាល់ ONE Championship ស្ថិតនៅចំណាត់ថ្នាក់លេខ ១ ដែលមានអ្នកមើលវីដេអូច្រើនជាងគេបំផុតតាម Facebook កាលពីឆ្នាំ ២០២១ ក្នុងចំណោមស្ថាប័នកីឡាធំៗនិងគ្រប់ប្រភេទកីឡាទាំងអស់នៅក្នុងពិភពលោក។ ស្ថាប័នប្រដាល់ធំបំផុតនៅអាស៊ីមួយនេះ បានបញ្ចប់ឆ្នាំ២ ០២១ ជាមួយនឹងចំនួនអ្នកចូលមើល (views) ធម្មជាតិ (មិនចំណាយប្រាក់)ចំនួន ៨.៨៤ពាន់លានដង ដែលស្ទើរតែច្រើនជាងគូប្រជែង១ពាន់លានដងឯណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកស្ថាប័នប្រដាល់កីឡាកាសពិភពលោក (WWE) ស្ថិតនៅចំណាត់ថ្នាក់លេខ ២ ដែលមានអ្នកមើល ៧.៩២ ពាន់លានដង ហើយចំណាត់ថ្នាក់លេខ ៣ បានទៅកីឡាគ្រីឃីកអន្តរជាតិ (ICC) ដែលទទួលបានអ្នកមើល ២.៦១ ពាន់លានដង។ ដោយផ្អែកលើស្ថិតិទាំងនេះ រយៈពេល ១២ ខែកាលពីឆ្នាំ ២០២១ បានក្លាយជាសញ្ញាបញ្ជាក់ពីឆ្នាំដ៏ជោគជ័យបន្ថែមទៀត សម្រាប់ ONE ដែលជាស្ថាប័នកីឡាធំជាងគេបំផុតក្នុងពិភពលោក។

អគ្គនាយក និងជានាយកប្រតិបត្តិ ONE Championship លោក Chatri Sityodtong បានបង្ហាញភាពរីករាយចំពោះសមិទ្ធផលនេះ និងបានអរគុណដល់អ្នកគាំទ្ររាប់ពាន់លាននាក់ទូទាំងពិភពលោក និងបុគ្គលិកទាំងអស់ ដែលធ្វើឲ្យសម្រេចបានលទ្ធផលដ៏ធំធេងនេះ។ លោកមានប្រសាសន៍ថា ៖«សម្រាប់ឆ្នាំ ២០២១ ស្ថាប័នប្រដាល់ ONE ស្ថិត ចំណាត់ថ្នាក់លេខ១ក្នុងចំណោមស្ថាប័នកីឡាទូទាំងពិភពលោកជាង៥០០០សម្រាប់អ្នកទស្សនាចូលមើលវីដេអូធម្មជាតិសុទ្ធ។ សូមអរគុណដល់អ្នកគាំទ្រដ៏អស្ចារ្យទាំងពិភពលោក។ សូមអបអរសាទរដល់ក្រុមការងាររបស់ខ្ញុំទាំងអស់ ដែលបានធ្វើឲ្យយើងសម្រេចបានលទ្ធផលដ៏អស្ចារ្យនេះ»។

ស្ថាប័នកីឡាធំៗលំដាប់ពិភពលោកផ្សេងៗទៀតដែលស្ថិតនៅក្រោម ONE មានដូចជាលីគបាល់ទាត់កំពូល Bundesliga, NASCAR, MotoGP, F1, NBA, UEFA Champions Leagues និង Major League Soccer ជាដើម។ ចំណែកស្ថាប័នប្រដាល់ក្នុងទ្រុង UFC និង Bellator MMA បានបញ្ចប់ ១២ ខែជាមួយនឹងអ្នកមើលវីដេអូសរុបចូលគ្នាត្រឹមតែ ១.៧៦៥ ពាន់លានដងប៉ុណ្ណោះ ដែលចំនួនតិចជាង ១ ភាគ ៤ នៃចំនួនដែល ONE ទទួលបានទូទាំងឆ្នាំ ២០២១៕

Related Topics:ONE Championship