កីឡា

យុវជន៥រូបនេះជាតួសំខាន់សម្រាប់ U23 កម្ពុជាពាន AFF U23 ខែនេះ

បានផុស

៤ years មុន

នៅ

ថ្ងៃអង្គារ ១ កុម្ភៈ ២០២២

ដោយ

កម្ពុជាទទួលធ្វើម្ចាស់ផ្ទះរៀបចំការប្រកួតជើងឯកយុវជនអាយុក្រោម២៣ឆ្នាំប្រចាំតំបន់អាស៊ាន ឆ្នាំ២០២២គឺ AFF U23 Championship 2022 នៅលើទីលាននៃពហុកីឡដ្ឋានជាតិមរតកតេជោ និងកីឡដ្ឋានមួយចំនួនទៀតពីថ្ងៃទី១៤ ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាម្ចាស់ផ្ទះ ក្រុម U23 កម្ពុជាត្រូវបានមហាជនមើលឃើញមានសង្ឃឹមខ្ពស់ក្នុងការឡើងទៅវគ្គបន្ត បន្ទាប់ពីចាប់ឆ្នោតចូលទៅក្នុងពូលជាមួយក្រុមដែលមានកម្រិតសមត្ថភាពមិនលើសខ្វះគ្នាប៉ុន្មាន។ កម្ពុជាស្ថិតនៅពូល A មានក្រុមទីម័រខាងកើត ហ្វីលីពីន និងព្រុយណេ។

បច្ចុប្បន្ននេះ កម្ពុជាសំបូរកីឡាករយុវជនល្អៗ បន្ទាប់ពីក្លឹបក្នុងស្រុកជាច្រើនបានកំពុងបណ្តុះបណ្តាលយុវជន បូករួមទាំងសាលាបាល់ទាត់ជាតិបាទីដែលបានក្លាយជាប្រភពធនធានដ៏សំខាន់ចំពោះក្រុមជម្រើសជាតិកម្ពុជា។

មុនពេល AFF U23 Championship ចូលមកដល់ យើងសូមលើកយកយុជន៥រូបដែលជាតួអង្គសំខាន់សម្រាប់ក្រុម U23 កម្ពុជាគឺ លឹម ពិសុទ្ធ យុវជនឆ្នើមរបស់ក្លឹបភ្នំពេញក្រោន, សៀង ចន្ធា សមាជិកសំខាន់របស់បឹងកេត, មិន រតនៈ យុវជនសំខាន់មកពីក្លឹបព្រះខន្ធរាជស្វាយរៀង, សារ ទី តួថ្មីសំខាន់របស់ក្លឹបវិសាខា និងយុវជនឆ្នើមក្រសួងការពារជាតិ ញាណ សុស៊ីដាន។

តាមពិតទៅនេះ គិតត្រឹមថ្ងៃទី១ ខែកុម្ភៈនេះ សហព័ន្ធកីឡាបាល់ទាត់កម្ពុជាមិនទាន់ប្រកាសបញ្ជីឈ្មោះ២៣នាក់ចុងក្រោយនៅឡើយទេ ប៉ុន្តែផ្អែកតាមសមត្ថភាព បទពិសោធ និងបច្ចេកទេសលើទីកន្លងមក យុវជនទាំង៥នាក់នេះមានភាគរយខ្ពស់ក្នុងការជាប់។ លើកលែងតែមានហេតុចាំបាច់ណាមួយដែលពួកគេមិនអាចចូលរួមបាន។

អ្វីដែលជាកម្លាំងចិត្តសំខាន់មួយទៀតនោះ លោក Keisuke Honda នឹងមកដឹកនាំក្រុម U23 កម្ពុជាដោយផ្ទាល់តែម្តង។ អ្នកចាត់ការសញ្ជាតិជប៉ុនដាក់គោលដៅសំខាន់សម្រាប់ស៊ីហ្គេម ឆ្នាំ២០២៣ ប៉ុន្តែលោកបានដឹកនាំប្រកួតសំខាន់ៗជាច្រើនមកហើយដូចជាពានរង្វាន់ AFF Suzuki Cup ជាដើម។ ជាមួយគ្នានេះ កីឡាស៊ីហ្គេម ឆ្នាំ២០២២ នៅប្រទេសវៀតណាម ក៏នឹងមកដល់នាខែឧសភាខាងមុខនេះ។