សម្ដេចពិជ័យសេនា ទៀ បាញ់ សំណូមពរប្រទេសអាស៊ានយោគយល់កម្ពុជា ពេលធ្វើម្ចាស់ផ្ទះស៊ីហ្គេម

​ការណ៍​ថ្លែង​បែបនេះ ​គឺ​នៅក្នុង​ឱកាស​ដែល​សម្តេច​អញ្ជើញ​ជា​អធិបតីភាព​ក្នុង​ពិធី​បើក​កិច្ចប្រជុំ​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍ (SEAGF-Council) ផ្លូវការ​នៅ​ព្រឹក​ថ្ងៃទី​១០ ខែមេសា គ្រា​ដែល​កិច្ចប្រជុំ​នេះ បាន​ប្រព្រឹត្តទៅ​រយៈពេល ៣​ថ្ងៃ ចាប់ពី​ថ្ងៃទី​០៨-១០ ខែមេសា ឆ្នាំ​២០២២​នេះ នៅ​ខេត្តសៀមរាប​។​

​ក្នុងឱកាស​នៃ​ពិធី​បើក​កិច្ចប្រជុំ សម្ដេច​ពិជ័យ​សេនា ទៀ បាញ់ បាន​រំ​ឮ​កថា កម្ពុជា​បាន​រង់ចាំ​អស់​រយៈពេល ៦៤​ឆ្នាំ ទើប​អាចមាន​លទ្ធភាព​ទទួល​ធ្វើជា​ម្ចាស់ផ្ទះ​រៀបចំ​ការប្រកួត​កីឡា​តំបន់​ដ៏​ធំ​នេះ (​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ​២០២៣) ។ ប៉ុន្ដែ​លទ្ធភាព​របស់​កម្ពុជា ដោយសារ​គតិបណ្ឌិត​ដ៏​ខ្ពង់ខ្ពស់ និង​ប៉ុន​ប្រសព្វ​របស់​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា ហើយក៏​ចំពេល​ដែល​កម្ពុជា​កំពុង​រស់នៅក្នុង​ដំបូល​សន្ដិភាព​ផងដែរ​។​

ក្នុងនាមម្ចាស់ផ្ទះ សម្ដេចពិជ័យសេនា ទៀ បាញ់ បានផ្ដល់នូវអនុសាសន៍ និងសំណូមពរមួយចំនួន ដល់កិច្ចប្រជុំក្រុមប្រឹក្សាសហព័ន្ធកីឡាអាស៊ីអាគ្នេយ៍ ខាងលើ រួមមាន​៖

១- កម្ពុជា​ប្រទេស​តូច ដែលមាន​បេះដូង​ធំ ប្ដេជ្ញា​ខំប្រឹងប្រែង​អស់ពី​លទ្ធភាព​រៀបចំ​ការប្រកួត​ស៊ី​ហ្គេម​-​អាស៊ាន​ប៉ា​រ៉ា​ហ្គេម តាម​ប្រតិទិន និង​កម្មវិធី​ដែល​បានគ្រោង​ទុក និង​ប្ដេជ្ញា​ខិតខំ​អនុវត្តតាម​ការផ្ដល់​ទំនុកចិត្ត​របស់​ក្រុមប្រឹក្សា​កីឡា​អាស៊ីអាគ្នេយ៍​

២- ស៊ី​ហ្គេម ឆ្នាំ​២០២៣ កម្ពុជា​ផ្ដោត​ការយកចិត្តទុកដាក់​លើ​ការគោរព​គោលការណ៍​កីឡា​ស្អាតស្អំ និង​កីឡា​បៃតង ដែល​គណៈកម្មាធិការ​ជាតិ​អូឡាំពិក​កម្ពុជា បានទទួល​សេចក្ដីសម្រេច​ពី​អង្គការសហប្រជាជាតិ ស្ដីពី “​កីឡា​ដើម្បី​សកម្មភាព​បម្រែបម្រួល​អាកាសធាតុ UN Sport For Climate Change Action” កាលពី​ថ្ងៃទី​០៤ ខែមេសា ឆ្នាំ​២០២២ ថ្មីៗ​នេះ​

៣- រាជរដ្ឋាភិបាល និង CAMSOC បានសម្រេច​ដាក់ចេញ​នូវ​ប្រតិបត្តិ​ការរៀបចំ​ស៊ី​ហ្គេម​-​អាស៊ាន​ប៉ា​រ៉ា​ហ្គេម តាម​យុទ្ធវិធី និង​យុទ្ធសាស្ដ្រ «​សន្សំសំចៃ តែ​ផ្ដល់នូវ​ភាព​អស្ចារ្យ​-Saving Games But Delivering Ther Best Games»

៤- សូមបញ្ជាក់​ជូន​ថា រាជរដ្ឋាភិបាល​បាន​សម្រេចយក​ខេត្តសៀមរាប ប្រារព្ធ​ព្រះរាជ​ពិធី​សុំ​ភ្លើង​អាទិទេព​កីឡា រួច​រត់​ដង្ហែរ​ភ្លើង​គប់​ទៅគ្រប់​បណ្ដា​ប្រទេស​ជា​សមាជិក SEA Games​។ ដូចនេះ សូម​គណៈកម្មាធិការ​ជាតិ​អូឡាំពិក ជា​សមាជិក​ក្រុមប្រឹក្សា​ជួយ​គាំទ្រ និង​រៀបចំ​ពិធី​ដង្ហែរ​ភ្លើង​គប់​ឲ្យ​ទទួលបាន​ជោគជ័យ​

៥- សម្ដេច​ពិជ័យ​សេនា ទៀ បាញ់ បាន​សំណូមពរ​បណ្ដា​ប្រទេស​សមាជិក និង​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍ៈ យោគយល់​ដល់​កម្ពុជា ដែល​នឹង​ធ្វើជា​ម្ចាស់ផ្ទះ​លើកដំបូង ហើយ​ផ្ដល់នូវ​ការគាំទ្រ​ក្នុង​ស្មារតី​មិត្តភាព សាមគ្គីភាព និង​ជាម​ហា​គ្រួសារ​កីឡា​ក្នុង​តំបន់ ក៏ដូចជា​ការជួយ​ផ្សព្វផ្សាយ​ពី​ព្រឹត្តិការណ៍​ប្រវត្តិសាស្ដ្រ​នៅ​កម្ពុជា​នេះ​ផងដែរ​

​ជាមួយគ្នា​ផងដែរ ឯកឧត្តម​បណ្ឌិត ថោង ខុន រដ្ឋមន្ត្រី​ក្រសួងទេសចរណ៍ ប្រធាន​គណៈកម្មាធិការ​ជាតិ​អូឡាំពិក​កម្ពុជា និង​ជា​សហប្រធាន​ក្រុមប្រឹក្សា​សហព័ន្ធ​កីឡា​អាស៊ី​អា​គ្ន​យ៍ ក៏បាន​មានប្រសាសន៍ថា​៖ «​កិច្ចប្រជុំ​ក្រុមប្រឹក្សា​លើក​នេះ ក៏​នឹង​បង្ហាញ​ដល់​សាធារណៈមតិ​ជាតិ អន្តរជាតិ អំពី​ភាពចុះ​សម្រុង​គ្នា ភាពរឹងមាំ​នៃ​ក្រុមប្រឹក្សា​សហព័ន្ធ​កីឡា​អាស៊ីអាគ្នេយ៍ ដែល​យើងទាំងអស់គ្នា ប្ដេជ្ញា​រួមសុខ​រួមទុក្ខ និង​រួមគ្នា​ធ្វើឱ្យ​ចលនា​កីឡា ក្លាយជា​ឧបករណ៍​រួមចំណែក​ថែរក្សា​ការពារ​សន្តិភាព និង​ការអភិវឌ្ឍ​សង្គម សេដ្ឋកិច្ចជាតិ និង​សេដ្ឋកិច្ច​តំបន់​យ៉ាង ពិតប្រាកដ​»​។​

​បន្ថែម​លើសពីនេះទៅទៀត​ក្នុងថ្ងៃនេះ​ផងដែរ អគ្គលេខាធិការ CAMSOC ឯកឧត្តម វ៉ា​ត់ ចំរើន បាន​មានប្រសាសន៍​បន្ថែមថា ក្នុងនាម​កម្ពុជា​ជា​ម្ចាស់ផ្ទះ​នេះ​គឺ​បង្ហាញ​ពី​របាយការណ៍​នៃ​ដំណើរការ​ស៊ី​ហ្គេម ២០២៣ ដូចជា​ការ​តៀម​ខ្លួន​ឆ្ពោះទៅកាន់​ពិធី ការដាក់បញ្ចូល​ប្រភេទ​កីឡា​ជាដើម​។​

​អគ្គលេខាធិការ CAMSOC បញ្ជាក់ថា អ្វីដែល​កម្ពុជា​លើកឡើង​ទាំង​ប៉ុន្មាន​គឺមាន​ការពេញចិត្ត និង​គាំទ្រ​តែម្ដង​ពី​បណ្ដា​ប្រទេស​អាស៊ាន​ចូលរួម ហើយ​ថែមទាំង​សរសើរ​ថា​ធ្វើ​លើក​ទី​១ ប៉ុន្តែ​បានល្អ​ប្រសើរ ប្រភេទ​កីឡា​ក៏​ដាក់​បាន​ច្រើន ប្រភេទ​កីឡា​តាម​ប្រទេស​នីមួយៗ​គឺ​ក៏​បញ្ចូល​ទាំងអស់​។ កម្ពុជា​ហាក់​រួចរាល់​សម្រាប់​ការត្រៀម​ធ្វើជា​ម្ចាស់ផ្ទះ​នៅ​ស៊ី​ហ្គេម ២០២៣ ឆ្នាំ​ក្រោយនេះ​៕

​រូបភាព​៖ Cambodia 2023

​អត្ថបទ​៖ មន្នី​រ័ត្ន​