អត្តពលិកហែលទឹកកម្ពុជា បំបែកកំណត់ត្រាថ្នាក់ជាតិ ក្នុងការប្រកួតជើងឯកពិភពលោក

អត្តពលិកកីឡាហែលទឹកកម្ពុជា បានបញ្ចប់បេសកម្មក្នុងការប្រកួតជ្រើសរើសជើងឯកពិភពលោក (FINA World Championships 2022) លើកទី១៩ ជាផ្លូវការ នាទីក្រុង Budapest ប្រទេសហុងគ្រី ក្នុងនោះ មានអត្តពលិកម្នាក់បានបំបែកកំណត់ត្រាថ្នាក់ជាតិរបស់ខ្លួន។

ក្នុងព្រឹត្តិការណ៍ពិភពលោកនេះ កម្ពុជា បានបញ្ជូនអត្តពលិកចំនួន ២ នាក់ទៅចូលរួម ក្នុងនោះកីឡាករ ១ នាក់ កីឡាការិនី ១ នាក់ ប្រកួតលើ ៤វិញ្ញាសាផ្សេងៗគ្នា ដែលបានចាប់ផ្ដើមពីថ្ងៃទី១៧ ខែមិថុនា ហើយនឹងបញ្ចប់នៅថ្ងៃទី០៣ ខែកក្កដា ឆ្នាំ២០២២ ប៉ុន្តែដោយកម្ពុជា អស់ការប្រកួតត្រឹមថ្ងៃទី២៤ មិថុនា ម្សិលមិញ។

ជាលទ្ធផលអត្តពលិកកម្ពុជា ធ្វើបានសម្រេចដូចជា៖

– កីឡាករ Charles Bennici បានប្រកួតនាថ្ងៃទី១៨ ខែមិថុនា ឆ្នាំ២០២២ លេីវិញ្ញាសា ៤០០ ម៉ែត្រ ហែលរបៀបសេរី ផ្នែកបុរស ក្នុងថេរវេលា ៤:២៦.៨២

– កីឡាករ Charles Bennici បានប្រកួត នាថ្ងៃទី១៩ ខែមិថុនា ឆ្នាំ២០២២ លេីវិញ្ញាសា ១០០ ម៉ែត្រ ហែលរបៀបផ្ងារ ផ្នែកបុរស ក្នុងថេរវេលា ១:០២.៥៧

– កីឡាការិនី សុខ វរល័ក្ខណ៍ បានប្រកួត នាថ្ងៃទី២៤ ខែមិថុនា ឆ្នាំ២០២២ លេីវិញ្ញាសា ៥០ ម៉ែត្រ ហែលរបៀបសេរី ផ្នែកនារី ក្នុងថេរវេលា ០:២៨.៦២

– កីឡាការិនី សុខ វរល័ក្ខណ៍ បានប្រកួត នាថ្ងៃទី២៤ ខែមិថុនា ឆ្នាំ២០២២ លេីវិញ្ញាសា ៥០ ម៉ែត្រ ហែលរបៀបកង្កែប ផ្នែកនារី ក្នុងថេរវេលា ០:៣៣.៨៤

អ្វីដែលជាការចាប់អារម្មណ៍ កីឡាការិនី សុខ វរល័ក្ខណ៍ បានបំបែកកំណត់ត្រាថ្នាក់ជាតិ ក្នុងថិរវេលា ០០:២៨.៦២ នាទី លើប្រភេទវិញ្ញាសា ៥០ ម៉ែត្រ ហែលរបៀបសេរី។ 

សម្រាប់ក្រុមជម្រើសជាតិ និងត្រលប់មកព្រះរាជាណាចក្រកម្ពុជា វិញនៅថ្ងៃទី២៦ ខែមិថុនា ឆ្នាំ២០២២ ស្អែកនេះ។

ការប្រកួតជ្រើសរើសជើងឯកពិភពលោក (FINA World Championships 2022) ធ្វើឡើងរៀងរាល់ ១ឆ្នាំម្ដង។ ហើយលើកទី១៩ ឆ្នាំ២០២២នេះ បានលើកពេលជាច្រើនលើកច្រើនសារដោយសារកូវីដ-១៩៕

អត្ថបទ៖ មន្នីរ័ត្ន