កីឡា

វិសាខា ត្រូវការត្រឹមស្មើក្រុមម៉ាឡេស៊ី ល្ងាចនេះក្នុងពានរង្វាន់ AFC Cup 2022

បានផុស

៤ years មុន

នៅ

ថ្ងៃព្រហស្បតិ៍ ៣០ មិថុនា ២០២២

ដោយ

ក្លិបបាល់ទាត់វិសាខា របស់កម្ពុជា ត្រូវការត្រឹមតែស្មើប៉ុណ្ណោះក្នុងការប្រកួតចុងក្រោយនៃពូល G ពានរង្វាន់ AFC Cup 2022 ទល់នឹងក្លិប Kedah Darul Aman FC របស់ម៉ាឡេស៊ី នាល្ងាចថ្ងៃទី ៣០ ខែមិថុនា ឆ្នាំ ២០២២ ដើម្បីបានកៅអីឡើងវគ្គបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតរវាងក្រុមទាំង ២ នឹងធ្វើឡើងនាវេលាម៉ោង ៨ យប់ (ម៉ោងនៅកម្ពុជា) ខណៈតាមស្ថានភាពបច្ចុប្បន្ន តារាងពិន្ទុសរុបពូល G វិសាខា កំពុងនាំមុខដោយមាន ៦ ពិន្ទុក្នុងដៃ ហើយក្រុមលេខ ២ ដែលតាមពីក្រោយ Bali United និង Kedah មាន ៣ ពិន្ទុ ដូច្នេះវិសាខា នឹងបានឡើងដោយស្រួល ប្រសិនបើស្មើ ជាមួយ Kedah ដែលបានសេចក្ដីថានឹងឈរកំពូលតារាង ដោយមាន ៧ ពិន្ទុ។

ប៉ុន្តែបើសិនភ្លាត់ចាញ់ Kedah FC នោះ វិសាខា នៅសល់ឱកាសក្នុងការឡើងទៅវគ្គបន្តផងដែរ នាមជាក្រុមលេខ ២ ល្អជាងគេ ដោយឈរលើ Bali United ទៀតព្រោះរូបមន្ត Head-to-Head វិសាខា បានឈ្នះ Bali។ ប៉ុន្តែយ៉ាងណាមិញ វិសាខា ត្រូវប្រៀបធៀបជាមួយក្រុមលេខ ២ នៃពូល H និង I សិនទើបអាចសម្រេចបាន ១០០ ភាគរយ។

តារាងពិន្ទុពូល G៖

លេខ 1. វិសាខា លេង ២ ប្រកួត ឈ្នះទាំង ២ ប្រកួត មាន ៦ ពិន្ទុ

លេខ 2. Bali United FC លេង ២ ប្រកួត ឈ្នះ ១ ចាញ់ ១ មាន ៣ ពិន្ទុ

លេខ 3. Kedah Darul Aman លេង ២ ប្រកួត ឈ្នះ ១ ចាញ់ ១ មាន ៣ ពិន្ទុ

លេខ 4. Kaya F.C–Iloilo ចាលេង ២ ប្រកួត ចាញ់ទាំង ២ មាន ០ ពិន្ទុ

បញ្ជាក់ថា ប្រសិនបើ វិសាខា ឈ្នះ ឬស្មើ នឹងបានឡើងទៅវគ្គពាក់កណ្ដាលផ្ដាច់ព្រ័ត្រ ប្រចាំតំបន់អាស៊ាន (ASEAN Zonal semi-finals)។

មួយគូទៀតផងដែរ ក្រុមរបស់កម្ពុជា ភ្នំពេញក្រោន នឹងត្រូវជួបក្លិបមកពីប្រទេសឡាវ Young Elephants ខណៈដែលប្រកួត គឺជាប្រកួតបង្គ្រប់កិច្ចដោយសារក្រុមទាំងពីរអស់ឱកាសឡើងវគ្គបន្តដូចគ្នា។ ការប្រកួតពូល I នេះនឹងធ្វើឡើងនៅវេលាម៉ោង ៩ យប់៕

អត្ថបទ៖ មន្នីរ័ត្ន