កីឡា

បាល់ទាត់នារីកម្ពុជាប៉ះជើងឯក៣សម័យ វៀតណាម លើកទី២ ពាន AFF WOMEN ល្ងាចនេះ

បានផុស

២ years មុន

នៅ

ថ្ងៃព្រហស្បតិ៍ ៧ កក្កដា ២០២២

ដោយ

ក្រុមបាល់ទាត់នារីជម្រើសជាតិកម្ពុជាត្រូវធ្វើការធ្ងន់ខ្លាំងមែនទែននៅពេលត្រូវជួបប្រកួតជាមួយក្រុមជម្រើសជាតិនារីខ្លាំងក្នុងតំបន់អាស៊ានគឺ វៀតណាម ក្នុងពានរង្វាន់ AFF WOMEN’S CHAMPIONSHIP 2022 វេលាម៉ោង៦ល្ងាចថ្ងៃទី៧ ខែកក្កដានេះ នៅកីឡដ្ឋាន BINAN ក្នុងប្រទេសហ្វីលីពីន។

វានឹងក្លាយជាការប្រកួតដ៏លំបាកបំផុតសម្រាប់ក្រុមបាល់ទាត់នារីកម្ពុជាល្ងាចនេះ ពីព្រោះក្រុមបាល់ទាត់នារីជម្រើសជាតិវៀតណាមមិនត្រឹមតែលេចធ្លោ និងខ្លាំងនៅក្នុងតំបន់អាស៊ានប៉ុណ្ណោះទេ ប៉ុន្តែក្រុមនារីអាស៊ានមួយនេះលេចធ្លោក្នុងកម្រិតអាស៊ី និងលើឆាកពិភពលោកទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពានរង្វាន់ AFF WOMEN’S CHAMPIONSHIP ក្រុមនារីវៀតណាមបានសាងកំណត់ត្រាឈ្នះជើងឯកស្ថិតនៅលំដាប់ទី២ បន្ទាប់ពីក្រុមបាល់ទាត់នារីថៃ។ ក្រុមនារីវៀតណាមធ្លាប់បានឈ្នះជើងឯកពានរង្វាន់នេះ៣លើកគឺឆ្នាំ២០០៦ ២០១២ និង២០១៩ ហើយធ្លាប់ជាជើងឯករង៣លើកដែរគឺឆ្នាំ២០០៤ ២០០៨ និង២០១៦។

ចំណែកក្រុមបាល់ទាត់នារីកម្ពុជាវិញទើបតែមានសកម្មភាពចូលរួមប្រកួតពីរលើកប៉ុណ្ណោះ និងជាលើកទី៣គិតទាំងឆ្នាំ២០២២នេះ ក្នុងពានរង្វាន់ AFF WOMEN ដែលត្រូវបានបង្កើតឡើងជាផ្លូវការតាំងពីឆ្នាំ២០០៤ និងធ្វើការប្រកួតរាល់ពីរឆ្នាំម្តង។

លើកដំបូងឆ្នាំ២០១៨ ក្រុមនារីកម្ពុជាបានឈ្នះ១ និងចាញ់៣ ក្នុងនោះឈ្នះទីម័រខាងកើត ១២-០ ប៉ុន្តែចាញ់ម៉ាឡេស៊ី ០-៤, ចាញ់ថៃ ០-១១ និងចាញ់អូស្ត្រាលី ០-១២។ លើកទីពីរ ឆ្នាំ២០១៩ ក្រុមបាល់ទាត់នារីកម្ពុជា មិនបានឈ្នះក្នុងការប្រកួតណាមួយឡើយ បន្ទាប់ពីចាញ់នារីវៀតណាម ០-១០, ចាញ់មីយ៉ាន់ម៉ា ១-១០ និងចាញ់ឥណ្ឌូនេស៊ី ០-៤។

នារីកម្ពុជា (អាវស) ពេលប្រកួតជាមួយ នារីឡាវ

ដូច្នេះការជួបក្រុមនារីវៀតណាមល្ងាចនេះគឺជាការជួបគ្នាលើកទី២ក្នុងប្រវត្តិរបស់ក្រុមទាំងពីរ បន្ទាប់ពីលើកទី១ នារីកម្ពុជារងបរាជ័យយ៉ាងធ្ងន់ធ្ងរ។ ទោះជាយ៉ាងណា សម្រាប់ការប្រកួតបើកឆាកពូល B កាលពីថ្ងៃទី៥ ខែកក្កដាកន្លងទៅនេះ ក្រុមនារីកម្ពុជាបានស្មើក្រុមនារីឡាវដោយលទ្ធផល ១-១ ដែលផ្តល់ឲ្យក្រុមទាំងមូលមានកម្លាំងចិត្ត៕

តារាងចំណាត់ថ្នាក់បណ្តោះអាសន្នពូល B