កីឡា

ហែលទឹកជនពិការឈ្នះមេដាយ៨គ្រឿងពីអាស៊ានប៉ារ៉ាហ្គេមទី១១ ធៀបឆ្នាំ២០១៧បាន២គ្រឿង

បានផុស

៥ ខែ មុន

នៅ

ថ្ងៃព្រហស្បតិ៍ ១១ សីហា ២០២២

ដោយ

អត្តពលិកជនពិការកម្ពុជាឈ្នះបានមេដាយមាស៧ ប្រាក់១០ និងសំរឹទ្ធ១១ ពីព្រឹត្តិការណ៍អាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូនេស៊ីដែលទើបបញ្ចប់កាលពីថ្ងៃទី៦ ខែសីហា។ ក្នុងនោះ កីឡាហែលទឹកបានឈ្នះមេដាយ៨គឺប្រាក់៣ និងសំរឹទ្ធ៥ដែលកំណត់ត្រាថ្មីសម្រាប់កីឡាហែលទឹកជនពិការកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាហែលទឹកជនពិការកម្ពុជាបានបញ្ជូនគ្រូបង្វឹក១រូបគឺលោក អ៊ូ គង់ គ្រូជំនួយ២រូបគឺអតីតកីឡាការិនីជម្រើសជាតិ ហែមថុន វិទីនី និងលោក ហួត ចាន់ថេង ហើយកីឡាការិនី២រូបគឺកីឡាការិនី ធឿន ចន្ថា និងកីឡាការិនី ជឿន គឹមហេង ខណៈកីឡាករ៨រូបគឺកីឡាករ ងែត បូរ, យូ សុជា, យ៉ុន មួយ, ឈឹម ទាត់, យ៉ាវ វណ្ណៈ, ឈឿន កុសល, ជូ ជុំ, កន ខ្លី និងខូយ កុយ។

ជាលទ្ធផល កីឡាករ ខូយ កុយ ដណ្តើមបានមេដាយប្រាក់២, កីឡាករ យ៉ុន មួយ ដណ្តើមបានមេដាយប្រាក់១ និងសំរឹទ្ធ១, កីឡាករ យ៉ាវ វណ្ណៈ ដណ្តើមបានមេដាយសំរឹទ្ធ៣ និង កីឡាករ ជូ ជុំ ដណ្តើមបានមេដាយសំរឹទ្ធ១។

កាលអាស៊ានប៉ារ៉ាហ្គេម លើកទី៩ ឆ្នាំ២០១៧ នៅប្រទេសម៉ាឡេស៊ី អត្តពលិកហែលទឹកជនពិការកម្ពុជាបានឈ្នះមេដាយតែ២គ្រឿងប៉ុណ្ណោះគឺប្រាក់១ និងសំរឹទ្ធ១។ ពេលនោះ កីឡាករ ង៉ែត បូរ ឈ្នះមេដាយប្រាក់លើវិញ្ញាសាហែលសេរីចម្ងាយ៥០ម៉ែត្រ និងកីឡាករ យ៉ាវ វណ្ណៈ ឈ្នះមេដាយសំរឹទ្ធលើវិញ្ញាសាហែលឯកត្តជនចម្ងាយ២០០ម៉ែត្រ៕

អត្ថបទ៖ វីរបុត្រ