កីឡា

គ្រូជម្រើសជាតិពេញចិត្ត Nick Taylor ខណៈសាមីខ្លួនសង្ឃឹមមានឱកាសម្ដងទៀត

បានផុស

៤ ខែ មុន

នៅ

ថ្ងៃសុក្រ ២៣ កញ្ញា ២០២២

ដោយ

លោក Ryu Hirose គ្រូបង្វឹកនៃក្រុមជម្រើសជាតិកម្ពុជា បានលើកសរសើរកីឡាករកូនកាត់ខ្មែរ-អាមេរិក Nick Taylor ថាល្អគ្រប់គ្រាន់ដើម្បីក្លាយជាផ្នែកមួយនៃក្រុមជម្រើសជាតិ បន្ទាប់ពីបានបង្ហាញខ្លួនប្រមាណ ៣០ នាទីក្នុងការប្រកួតទល់នឹង បង់ក្លាដែស កាលពីយប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករវ័យ ២៣ ឆ្នាំរូបនេះ ត្រូវបានផ្លាស់ប្ដូរចូលនៅនាទី ៦០ ពេលកម្ពុជាត្រូវបានបង់ក្លាដែស នាំមុខ ១-០។ រយៈពេលជាង ៣០ នាទី Nick បានបង្ហាញទម្រង់លេងគួរឱ្យចាប់អារម្មណ៍ផងដែរ ជាពិសេសស្ទើរតែតចូលមួយគ្រាប់។ ជាមួយនឹងការបង្ហាញទម្រង់លេងបែបនេះ លោក Ryu Hirose បាននិយាយពី Nick Taylor ក្នុងសន្និសីទសារព័ត៌មានក្រោយចប់ការប្រកួតថា៖ «ដូចដែលយើងបានឃើញ ទម្រង់លេងរបស់គាត់មិនជាបញ្ហាទេ ដោយយោងទៅលើការហ្វឹកហាត់ និងការប្រកួតថ្ងៃនេះ។ គាត់បានធ្វើឱ្យមានលក្ខខណ្ឌដ៏ខ្ពស់ បើទោះបីជាគាត់មិនអាចរកគ្រាប់បាល់ ប៉ុន្តែល្អគ្រប់គ្រាន់ហើយ គាត់គ្រប់គ្រាន់ដើម្បីក្លាយជាផ្នែកមួយនៃក្រុមជម្រើសជាតិ។»

ដោយឡែកសាមីខ្លួន Nick Taylor វិញបានសម្ដែងមោទកភាពដែលបានលេងតំណាងជាតិ និងជាពិសេសចង់ចូលរួមម្ដងទៀតក្នុងពានជើងឯកអាស៊ីអាគ្នេយ៍ (AFF Mitsubishi Electric Cup) នៅចុងឆ្នាំ ២០២២ នេះ។ «ខ្ញុំពិតជាមានមោទនភាពខ្លាំងមែនទែន សម្រាប់ការលេងឱ្យប្រទេសរបស់ខ្ញុំ ខ្ញុំសង្ឃឹមថាខ្ញុំនឹងទទួលបានឱកាសលេងនៅទីនេះទៀត ក្នុងពាន AFF Cup។» សម្ដីរបស់ Nick Taylor។

សូមបញ្ជាក់ថា Nick Taylor កើតឆ្នាំនៅតំបន់ Coppell រដ្ឋតិចសាស សហរដ្ឋអាមេរិក ដែលមានម្តាយជាជនខ្មែរ និងឪពុកជាជនអាមេរិក ដូច្នេះរូបគេមានសិទ្ធិតំណាងឲ្យជម្រើសជាតិកម្ពុជា៕

អត្ថបទ៖ មន្នីរ័ត្ន