កីឡា

Neymar ត្រូវរង់ចាំអ៊ុតលទ្ធផលថាបានលេង World Cup ឬយ៉ាងណានៅថ្ងៃសុក្រនេះ

បានផុស

៤ years មុន

នៅ

ថ្ងៃសុក្រ ២៥ វិច្ឆិកា ២០២២

ដោយ

Neymar ហាក់ស្រក់ទឹកភ្នែកនៅកៅអីបម្រុងនៅចុងបញ្ចប់ នៃការប្រកួតបើកឆាកពានរង្វាន់បាល់ទាត់ពិភពលោក (FIFA World Cup 2022) របស់ប្រេស៊ីល ទល់នឹងក្រុមស៊ែប៊ី បន្ទាប់ពីត្រូវបានប្ដូរចេញដោយរបួសកជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វេជ្ជបណ្ឌិតរបស់ក្រុមប្រេស៊ីលបានបញ្ជាក់ថា ខ្សែប្រយុទ្ធរូបនេះបានរងរបួស ហើយនឹងត្រូវពិនិត្យឡើងវិញនៅថ្ងៃសុក្រ។

កីឡាករវ័យ ៣០ ឆ្នាំរូបនេះ ត្រូវបានប្ដូរចេញនៅនាទី ៨០ នៃជ័យជម្នះ ២-០ កាលពីថ្ងៃព្រហស្បតិ៍ បន្ទាប់ពីមានការប៉ះទង្គិចយ៉ាងធ្ងន់ធ្ងរពីសំណាក់កីឡាករ Nikola Milenkovic។ រួចគេបានអង្គុយបិទមុខពេលកំពុងទទួលការព្យាបាល ហើយរូបភាពបង្ហាញថា កជើងខាងស្ដាំហើមខ្លាំង។ ក្រុមនេះ នឹងប៉ះជាមួយស្វីស ក្នុងការប្រកួតពូល G ទី ២ របស់ពួកគេ នៅថ្ងៃច័ន្ទ។

វេជ្ជបណ្ឌិតរបស់ក្រុម លោក Rodrigo Lasmar បាននិយាយថា “ថ្ងៃស្អែក [ថ្ងៃសុក្រ] យើងនឹងមានការវាយតម្លៃថ្មីមួយ។ ឥឡូវនេះ យើងត្រូវរង់ចាំ យើងមិនអាចធ្វើការអត្ថាធិប្បាយមុនពេលកំណត់បានទេ”។

យ៉ាងណាមិញ លោក Tite គ្រូបង្វឹកសញ្ជាតិប្រេស៊ីលបានទទូចថា «យើងមានទំនុកចិត្តថា Neymar នឹងបន្តលេងនៅ World Cup»។

ខ្សែប្រយុទ្ធរបស់ក្លិប Paris St-Germain បានជួបបញ្ហារបួសជាច្រើនជាមួយនឹងជើងស្ដាំរបស់គេក្នុងរយៈពេលប៉ុន្មានឆ្នាំចុងក្រោយនេះ។

គេបានខកខានការប្រកួត Copa America ឆ្នាំ ២០១៩ បន្ទាប់ពីរងរបួសសរសៃចងនៅកជើងខាងស្ដាំ ហើយត្រូវអវត្តមានជាច្រើនសប្ដាហ៍ក្នុងឆ្នាំ ២០២១ ជាមួយនឹងរបួសស្រដៀងគ្នា។

Neymar ត្រូវបានគេប៉ះផ្ដួលរហូតដល់ពិន័យ ៩ ដង ក្នុងអំឡុងពេលប្រកួតជាមួយស៊ែប៊ី ដោយបានស៊ុតហ្វ្រីឃីក ៤ ដង ច្រើនជាងកីឡាករដទៃទៀតនៅ World Cup ឆ្នាំនេះមកទល់ពេលនេះ៕

ប្រភព ៖ BBC

អត្ថបទ ៖ មន្នីរ័ត្ន