កីឡា

លោក Conor និយាយពីការនាំចូលកីឡាករថ្មី ២រូបមកកាន់ព្រះខ័នរាជស្វាយរៀង

បានផុស

១ year មុន

នៅ

ថ្ងៃព្រហស្បតិ៍ ៥ មករា ២០២៣

ដោយ

ក្លិបបាល់ទាត់ព្រះខ័នរាជស្វាយរៀង ត្រឹមរយៈពេល ២ថ្ងៃនេះ បានប្រកាសពីការនាំចូលកីឡាករថ្មីចំនួន ២រូប ដើម្បីត្រៀមសម្រាប់រដូវកាលថ្មីនៃលីគកំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករទាំងពីររូបនេះ ត្រូវបានស្គាល់យ៉ាងច្បាស់ដ្បិតធ្លាប់ជាសមាជិកនៃក្រុមជម្រើសជាតិកម្ពុជា នោះគឺកីឡាករ សេត រ៉ូស៊ីប ខ្សែការពារស្វាបឆ្វេង ផ្ទេរមកពីក្លិបបឹងកេត និងម្នាក់ទៀតកីឡាករកូនកាត់ខ្មែរ-បារាំង គួច ដានី ដែលផ្ទេរមកពីក្លិបណាហ្គាវើលដ៍។

ជាមួយនឹងការនាំចូលកីឡាករថ្មីនេះ លោក Conor Nestor បានឱ្យ កម្ពុជាថ្មី ដឹងថា «យើងរីករាយក្នុងការចុះហត្ថលេខាលើដានី និងរ៉ូស៊ីប ពួកគេគឺជាកីឡាករដែលបានបង្ហាញឱ្យឃើញពីការធ្លាប់ឈ្នះពានលីគ និងលេងឱ្យក្រុមជម្រើសជាតិ។ ពួកគេនាំមកនូវគុណភាព និងបទពិសោធន៍កាន់តែច្រើនដល់ក្រុមរបស់យើង។»

គ្រូបង្វឹកសញ្ជាតិអៀរឡង់ខាងជើងរូបនេះ បាននិយាយពី សេត រ៉ូស៊ីប ទៀតផងដែរថា «ជាមួយនឹងសេត រ៉ូស៊ីប ខ្ញុំជឿថា ការពារឆ្វេងគឺជាទីតាំងដ៏ល្អបំផុតរបស់គាត់ ប៉ុន្តែយើងក៏ចូលចិត្តគាត់ដែរនៅពេលដែល Felix Dalmas ដាក់គាត់ឱ្យលេងនៅស្លាបស្តាំសម្រាប់ជម្រើសជាតិកម្ពុជា។ គាត់គឺជាជម្រើសមួយនៅក្នុងមុខតំណែងទាំងពីរសម្រាប់ពួកយើង។»

«ដានី គឺជាកីឡាករកំពូលម្នាក់ ហើយគាត់បានផ្តល់ឱ្យយើងនូវអ្វីដែលខុសប្លែកពីអ្វីដែលយើងមាននៅក្នុងខ្សែបម្រើរួចហើយ។ គាត់មានសមត្ថភាពក្នុងការបញ្ជូនបាល់ (Assists) និងស៊ុតបញ្ចូលទីពីតំបន់បម្រើ។» លោក Conor និយាយបន្ថែមអំពី ដានី។

លោក Conor Nestor ក៏បានបង្ហើបឱ្យដឹងទៀតផងដែរថា ព្រះខ័នរាជស្វាយរៀង ក៏មានគម្រោងក្នុងការនាំចូលកីឡាករបន្ថែមផងដែរ ប៉ុន្តែលោកសូមរក្សាសិទ្ធិមិនបញ្ចេញឈ្មោះកីឡាករចំៗ។